Napoleon Bonaparte

Uut Wikipedia, de vrye encyklopedy
Napoleon Bonaparte (1801)

Napoleon Bonaparte (geboren op 15 augustus 1769 in de plak Ajaccio op et eilaand Korsika – sturven op 5 meie 1821 op et eilaand Sint Helena) was een generaol van de Fraanse Revolusie en was de leider van Fraankriek as Eerste Konsul (Premier Consul) van de Fraanse Rippebliek van 11 november 1799 tot an 18 meie 1804 en daornao as Keizer van de Fraansen (Empereur des Français) en Keuning van Italië onder de naeme Napoleon I van 18 meie 1804 tot 6 april 1814, en laeter weer hiel kot van 20 meert tot 22 juni 1815, een peer daegen naodat hi'j versleugen was bi'j Waterloo.

Napoleon wodt zien as een militair genie, en is bekend deur et leiden van een groot antal suksesvolle kampanjes, hoewel der ok een peer slim grote mislokkings tussen zatten.

In de loop van krek iets meer as 10 jaor bemachtige hi'j de kontrole over et grootste pat van West- en Centraol-Europa deur overwinnings en deur verdraegen te sluten, tot zien nederlaoge in de Slag bi'j Leipzig in oktober 1813. Een peer maonden laeter wodde hi'j ofzet en vongen neumen op et eilaand Elba. Zoe'n 10 maonden laeter kwam hi'j weer an de macht, disse tied staot bekend as de Honderd Daegen (Les Cent Jours). Hi'j wodde uutaenlik versleugen in de Slag bi'j Waterloo in België op 18 juni 1815. Kot daornao wodde hi'j opni'j vongen neumen deur de Ingelsen en is doe verbannen naor et eilaand Sint Helena, waor hi'j in 1821 sturven is.