Medrid

Oet Wikipedie, de vraaie enzyklopedie
Gao naor: navigasie, zeuk
Disambig-dark.svg Dit artikel giet oaver de heufdstad van Spanje. Aandere betiekenissen van Medrid / Madrid viej op Madrid (verdudeliken)

Medrid of Madrid is de heufdstad van Spanje,[1] van de Comunidad de Madrid en van de pervincie mit dezölfde name. De stad, ok wal La Villa y Corte enuumd (ongeveer De Stad en 't Hof), hef 't grootste oppervlak en de mieste inwoners van alle Spaanse steden, mit officieel 3.132.463 inwoners in de gemiente[2][3] en 5.843.031[4] in de metropool, waordeur 't op de darde plek kump van stedelijke gebieden mit de grootste bevolking in de Europese Unie.

As heufdstad van de staot huusvest Medrid de gebouwen van de oaverheid, 't parlement (las Cortes) en veuranstaonde oaverheidsinstellings. Ok de keuning van Spanje hef er zien officiële residentie.[5] Medrid is een belangriek financieel, industrieel en cultureel centrum. Een bulte laandelijk opererende bedrieven en een köppel van de grootste corporaoties ter wereld hebt d'r heur stee.[6] In Medrid viej de heufdvestiging van de Wereld Toerisme Orgenisaotie. Ok orgeniseert ze er de toerismebeurs FITUR. D'r bint internationaol bekende musea zoas 't Prado, 't Thyssen-Bornemisza en 't Reina Sofía.

Medrid begunden as een verstarkte vesting van de Moren (Mayrīt, مجريط; in old Kasteljaons Magrit, Magerit of Matrit). Verskeiden skrievers mient op basis van archeologische vondsten det dizze vesting ebouwd wördden op de plek van een zeuvende-ieuwse Visigotische nederzetting mit de name Matrice of 'revierbedde'.[7][8] De plaatse wördden in 1083 veroaverd deur Alfons VI van Castilië. De Spaanse keuning Filips II keus de stad in 1561 veur zien hof, daormit 't de eerste permanente heufdstad van de Spaanse monarchie wördden. Van die tied of - behalve van 1601 töt 1606, toe as Valladolid veur een tiedtien de heufdstad was - hef Medrid de heufdstad van Spanje ewest. Ok van die tied of hef 't de regeringszetel ewest, behalve in de Spaanse börgeroorlog, toe as de regering van de Rippebliek tussen november 1936 en jannewaori 1939 in Valencia en Barcelona zat.

Rifferenties[bewark | bronkode bewarken]

De rifferenties bint Spaanstalig as ter niet aanders bi'j stiet.

  1. Spaanse grondwet, art. 5: 'De heufdstad van de Staot is de villa Medrid.'
  2. Instituto nacional de Estadística, ezien op 28/12/2007
  3. 3.238.208 volgens de börgerlijke staand van de gemiente in 2008: Padrón Municipal de Habitantes a 1 de enero de 2008
  4. De getallen koomt van 't preject AUDES5, det de metropolitaone gebieden van Spanje wil vaststellen, in 2005. Aandere tellings geeft verskillende inwonerantallen.
  5. 't Keuninklijk Paleis van Medrid op de Plaza de Oriente. De privé-woning van de Keuning is La Zarzuela, op 't end van 't gemientelijke district Fuencarral-El Pardo: Comunidad de Madrid oaver El Monte de El Pardo
  6. Banco de Santander, BBVA, Telefónica, Repsol YPF, Iberia, Endesa, FCC... onder de 200 eersten volgens Forbes in 2007: webstee van Forbes (Engels)
  7. El Madrid precristiano
  8. Madrid Histórico