Korhoonder

Oet Wikipedie, de vraaie enzyklopedie
Gao naor: navigasie, zeuk
Nen korhaann in t Boarglaandbos
Lyrurus tetrix tetrix

t Korhoonder (Lyrurus tetrix volgns IOC WBN[1] vake ook: Tetrao tetrix) is nen vogel oet de familie van roewpoothoonders (Tetraonidae). t Vröwken neumt ze ne korhenne en t männeken nen korhaann, wat mangs ook as soortnaam gebroekt wörd.

n Haann is ongevear 50 cm laank, is zowat helemoal zwart met her en der wit op de vleugels en nen kromn start wat op ne liere lik. De henne is griesbroen met stippelige baandn oawer t lief, en ongevear 42 cm laank.

Vuurkomn[bewark | bronkode bewarken]

Korhoonders tref iej in n groot deel van t noordn van Europa, ook in België en Neerlaand. t Korhoonder is in Europa nen kultuurvolger. Van oorspoonk kon t zik good redn in haalflösse boargbossen met morrelaandn en heede. Doo't de roewe groondn oontgunn wördn, kree'j in t oostn van Neerlaand hele heedevlaktes, woer't t korhoonder zik good redn kon. Doo't de heedeveeldn verdweenn, dr mear toeristn ofkömn op t de oawerbleewne stukn, en t gebeed verdreugn, is dr weainig van de korhoonders oawerbleewn. Dit geeldt vuur heel Europa.

Op de Sallaandse heuwelrugge bie Hooltn probeert ze al verskeaidene joar de leste korhoonders te redn. Dr wördn zelfs in 2012 vuur €90.000,- spesjale korhoonders oet Zweedn in evlöagn, dee't vuur niej blood mossen zorgen. Dit leek good te goan; dr warn broodkoppels en zelfs verskeaidene eier oet ekömn. Op 7 juli 2012 meeldn De Twentsche Courant Tubantia skoonwal det dr 28 kuukns dood warn egoan. Det gebuurn de vuurgoande dree joar ook al.[2] Oet oonderzeuk bleek at de kuukns te weainig etn hadn ehad. Dit keump woarskienlik umdet dr vuur t korhoonder op de Sallaandse Heuwelrugge nit genog etn te veendn is. Tookn joar wil Stoatsbosbehear vuur n poar ton nog es 20 töt 25 korhoonders oet Zweedn loatn komn en goan bievoorn met spesjaal ekweekte spreenkhaann. Nit alle lokale ambtenoarn zeent t doar met eens.[3]

Verwiezingn[bewark | bronkode bewarken]

  1. Gill, F., Wright, M. & Donsker, D. (2010). IOC World Bird Names (version 2.6).
  2. TCtubantia.nl. Kuikens korhoenders sterven massaal. Skreewn en bekekn op 7 juli 2012.
  3. TCTubantia. "Korhoen Geldverspilling". Skreewn en bekekn op 9 juli 2012