Zuud-Westerkwartiers
Et Zuud-Westerkwartiers (ok Zuud-Westerkertiers of Zuud-Westerkertaaiers) is n benoaming veur de dialekten die ien t zudeleke deel van et Westerkwartier sproken worden. De term het gien wetenschoppelke definitie mor wodt ien e omgang bruukt om de dialekten van et Westerkwartiers zudelek van et Middaglaands en Kölmerlaands aan te duden. Et sproakgebied vaalt grofweg soamen met e olde gemeenten Leek, Moarum en delen van Grodegast. Dit komt ok overeen met e olde grietenijen Vredewold en delen van Laangewold.
Kenmarken
[bewark | bronkode bewarken]Et Zuud-Westerkwartiers is veur et grootste deel etzulfde as et bredere Westerkwartiers, mor wiekt toch op n poar menieren òf. Bronnen met kenmarken van et Zuud-Westerkwartiers bennen dr niet veul, mor dr binnen nog aal veurbeelden die voak heurd worden kinnen:
1. Gebruuk van n lange uu-klank
[bewark | bronkode bewarken]Ien stee van de oe-klank ien et Westerkwartiers, of de ui-klank of uie-klank die ien et Grunnegers bruukt wodt, wodt ien et Zuud-Westerkwartiers voaker een uu-klank bruukt.
Veurbeelden:
- bruur (Westerkwartiers: broer, Grunnegers: bruier)
- gruun (Westerkwartiers: groen, Grunnegers: gruin)
2. Uutspreken van -sch as -sk
[bewark | bronkode bewarken]Woar ien e meeste Grunneger dialekten een sch-klank bruukt wodt, wodt ien et Zuud-Westerkwartiers voaker n sk-klank bruukt. Et is belangriek doarbij te melden dat dizze woorden nog aal met -sch schreven worden.
Veurbeelden:
- Schip as skip
- Schoel as skoel