Wich van Lapedo
Et Wich van Lapedo (officieel Lagar Velho 1) is een volledig prehistorisch skelet wat in nen grot in Portugal vunden is. Wettenskoppers meent, et is nen mengvörm van nen neanderdaler en modern menske. Kolstofdatering wis oet at et kind zo'n 26 töt 25 doezend joar terugge leavden.
In 1998 leidden prehistorisch archeoloog João Zilhão een onderzeuk noar ne olde menskelike growestee. 'n Vundst wis oet at vrogmoderne mensken in de öldere steentied leavden in et westen van et Iberische skiereiland. De zowat komplete oawerblievsels van et kind, wat ongevear veer joar old was do as et störf, loat zeen at et heufd, 'n kin, de tanden en samenstelling van et geraamte kenmarken had van beide neanderdalers en homo sapiens. Et gavven te denken dat dee lesten de eersten nich enkel met oorlog oetreuiden (zo as doarveur altied dacht), mer dat de beide heanig an duur inmenging versmeulten töt wat wiej noe as mensken kent. In den tied was et genoom van neanderdalers nog nich in kaarte bracht. Zo wust de wettenskop nog nich dat zowat alle leu op de wearld neanderdaler-DNA in zich hebt. Et is nog ondudelik wo as et kan dat der een neanderdaler-achtig wich opdeuk zo'n tien doezend joar noa at de neanderdalers oetstörven.
Et wich wör begreaven met een kanientjen op de börste, woarskienlik as growegift. Oet dezelfde kolstofdatering wet wettenskoppers dat de grot zo'n dree honderd joar in gebroek was en noa et begreaven van et wich zo'n twee doezend joar nich meer.
In de bezeukershalle van Lagar Velho is nöast nen noamaak van et skelet ook ne rekonstruktie van et gezichte te zeen.