Stadshagen (Stockholm)

Uut Wikipedia, de vrye encyklopedy
Nå navigaty springen Nå söken springen
Disambig-dark.svg Stadshagen is ok de name van een wiek van Zwolle, de name van een metrostesjon in 't Stockholmse Stadshagen, en de Zweedse name van Kaupunginhaka, een stadsdiel van de Finse stad Porvoo.
Jaoren-dartig-bouw in Stadshagen, Stockholm
Arbeidershuusies in Gamla Stadshagen in 1955

Stadshagen is een stadsdiel van de Zweedse heufdstad Stockholm. 't Lig in 't noorden van 't eilaand Kungsholmen, in 't district Sankt Göran. 't Stadsdiel is in 1938 ontstaon toen as westelk Kungsholmen in vier neie stadsdielen opedield wördden. In 2017 had Stadshagen zo'n 8500 inwoners, van wie der zo'n 28,8 percent van butenlaandse ofkomst waren.

In Stadshagen vien ie ien van de grote ziekenhuzen van Stockholm, ok ien van de oldste van 't laand, Sankt Görans sjukhus. Op de hudige locatie deu 't de deuren lös in 1888. De karke Sankt Görans kyrka stamt uut 1958; der gunk een kapel uut 1910 an veurof. In 't stadsdiel lig ok de barg Stadshagsberget, die 52 meter baoven zeeniveau uutstek. Vanof de barg hej een schier uutzicht aover 't Karlbergspeleis en aover stadsdiel Vasastaden in centraol Stockholm.

Geschiedenis[bewark | bronkode bewarken]

De name Stadshagen veur 't gebied kwaamp al in de 17de ieuw veur. Lange tied beheurde 't töt de laandelijke umgeving van Stockholm, mit een paar grote boerenspillen, een ketoenfebriek en een sukerfebriek. End 19de, begun 20ste ieuw was 't gebied een sloppenwiek waor arme en dakloze Stockholmers heur hutties dalezetten. In 1909 wördden ien van de oldste volkstuuntiescomplexen van de stad der opericht, de Karlbergs-Bro koloniförening.

Wegens huzentekört in Stockholm stelde de aoverheid begun 20ste ieuw in dizze contreien goedkope, barakachtige neudhuusies beschikber. Dizze bebouwing wördden Gamla Stadshagen ('t olde Stadshagen) enuumd, of ok wal guldgrävarlägret ('t goldzukerskaamp). De "boshutties" van Gamla Stadshagen wördden in de jaoren zestig ofebreuken. De in 1947 ebouwde flat of kollektivhuset Kvinnohemmet is mit zien veertien verdiepingen en gele façade een opvalende anwezigheid in westelk Kungsholmen.

In de jaoren zestig, zeuventig en tachtig wördden buurten ebouwd mit grote kantoorgebouwen en industriële complexen. Sindsdien is der ok weer industrie vervöngen deur neie woonbuurten. In 1975 is tunnelbanestation Stadshagen lös edaone, een stesjon op de blauwe liende van de Stockholmse metro. Der is ok een terrein veur sport en atletiek, Stadshagens IP.

Nuvola apps ksig.png Dit artikel is eschreven in 't Zuudwest-Drèents.
Wikimedia Commons Commons: Stadshagen (Stockholm) - plaatjes, filmkes en/of gelüüdsbestanden.