Kleaine tromme

Snoartromme

De snoarn an de eunterkaante

De kleaine tromme of snoartromme (Engels: snare drum) steet bekeand um zin skoarpe, ruusnde geluud. Dèt geluud krig-e duur n matje van snoarn wat laanks t oondervel is espönn. Duur op de tromme te houwn wordt de snoarn an t triln ezat, woerbiej ze t vel raakt.

Geschiedenis

De eerste snoartrommn hadn velle dee-t emaakt warn van bloazn van deers, en nen darm as snoare.

In de late middeleewn wör de tromme in Zwitserlaand in ezat vuur t begeleaidn van marsjeernde troepn (later wör hier meardere instremeantn an too evoogd, woerduur de militaire kapel ontsteun). Dit gebroek wör in heel Europa oawer enömn. De leste 2 eewn hef de Snoartromme völle ontwikkelingn met emaakt.

In 1914 bedachn Robert Danly n mechaniek um de snoarn teegn, of van t vel of te dreejn.
Met t onstoan van Jazz, kwam de vroage noar kleainere tromn. Dee wördn toew zo an epast dèt ze in n drumstel past.

De ontdekking van keunststof hef völle veraanderd in hoo de Snoartromme dr rechtevoort oet zut. n Kèttel wördt rechtevoort van hoolt, metaal of keunststof emaakt en kan in iedern geweunsketen kluur vuurkomn. De velle wordt rechtevoort ook van keunststof emaakt, of mangs zelfs van kevlar. Ook de snoarn wordt rechtevoort van keunststof emaakt, of, vuur n dubbel zo skoarp geluud, van metaal.

Soortn

drumstelsnoartromme

Marsjeertromme tiedns ne wachtwissel

de Snoartromme is feailik in 3 soortn te verdeeln.

• Drumstel- of orkestsnoarntromme
• Marsjeertromme
• Amerikaanse of Skotse (marsjeer)tromme.

Drumstel- of orkestsnoartromme

Dit soort wördt in orkestn en drumsteln gebroekt en is doarumme miskien rechtevoort wal t bekeandst. ne Normale moate vuur tromn is ongevear 35cm in diameter. Dit geeldt vuur alle soortn snoartromn. Ne normale drumstel- of orkestsnoartromme is ongevear 15cm deepe, mear dr bestoat ook snoartromn van ongeveer 7,5cm. Dit wordt ne pikkolotromme neumd, of in n volksmoond pannekookn, umdèt-e zo plat is.

Marsjeertromme

Disse tromme wördt in tradisjonele korpsn bespölt en wördt vuural in marsmeziek gebroekt. t Verskil met n vuurigen is dèt-e dubbel zo deep is. Hierduur krig-e n vol, deep geluud, zodèt-e boetn bètter te heurn is.

n Spöller dreg t deenk an n reem oawer n rechterskoolder (woerduur-te skeef op t leenkerbeen haank) of an nen beugel oawer beaide skoolders, woerduur-te rech haank.

Skotse of Amerikaanse tromme

An n vörm is weainig verskil met de normale marsjeertromme. Mear duur t gebroek van metaalsnaarn en kevlarvelle op ekstra heuge spanning kleenkt n Skotsn ekstra skoarp. Den heuge spanning har in t begin n noadeel. t Kon gebuurn dèt n raand duur den hoogn spanning noar binn treuk en t hele instremeant an bölle lea. Um dit te vuurkomn hebt ze rechtevoort ekstra dikke reande an t instremeant emaakt.

n Amerikaansn kleenkt iets meender skoarp as n Skotsn, duurdèt r earder vuur keunststof snoarn wörd ekeuzn, umdèt de snoartromme in dit soort korpsn nit zo op de vuurgroond mut wean.

Stokvoering

tradisjoneeln greep

geliekn greep

Dr beent 2 meneern um de stökke vaste te hooldn:

• tradisjoneeln greep
• geliekn greep

n Tradisjoneeln greep is bedach vuur de tradisjonele marsjeertromme. In vrooger tiedn hung disse tromme dus skeef op t leenkerbeen *, woerduur n spöller n leekeroarm n heeln tied in nen roarn hook umhooge mos hooldn um nen goon slag te maakn. Dèt gung op n doer zear doon.

Duur n stok in n leenkerhaand met t achtereande tusken doem en wiesvinger, en met de vuurkaante tusken middelvinger en reenkvinger te legn (en n wiesvinger en middelvinger oawer n stok hen te legn) hoof n spöller n oarm mear heel weainig umhooge te buurn en kan-e vanoet n pols nen slag maakn.

n Rechterhaand heult n stok gewoon tusken doem en wiesvinger, woerbiej de aandere vingers wal um n stok hen ligt, mear alleene zorgt dèt n spöller n stok nit verlös. n Stok heurt liek te wean met n oarm, en n haand mut met de rugge noar boawn stoan. Belangriek vuur n oetstraling is dèt n peenk nit estrekt is, mear netjes um n stok hen ligt.

Biej n geliekn greep heult n spöller beaide stökke op de meneere van de rechterhaand vaste zoas dèt hierboawn beskreewn is. Dissen greep wördt duur völle drummers op n drumstel an eheuldn, umdè-j zo de oarme ook noar boetn köant dreejn en dus n mear köant raakn.

Aanders as dè-j miskien verwochet, kiest völle (meestieds Amerikaanse) korpsen, ondaanks dèt ze de snoartromme rech an n beugel hebt hangn, vuur n tradisjoneeln greep, umdèt dit meuier lik. Dr beent ook korpsn dee-t de snoartromme skeef an de beugel hangt, umdèt ze meant dèt ze aans geluudsverlees hebt en dèt dit bètter vuur n leenkeroarm is.

Soortn stökke

Spazzole-weejers

Stökke beent r in alle soortn en moatn. Laank, kort, dik, dun, zwoar, lech, met t gewich vuur of achterin n stok, met nen dikn of nen dunn, of nen hooltn of nylon kop. Ieder soort stok hef zin eegn geluud. n Korps wat völle boetn mut spöln gebrok dikkere stökke, umdèt t geluud dan vearder dreg.

n Heel aander soort stökke beent de kwèste. Dit beent oetskoefboare weejers met iezerne of nylon dröadkes, woermet oawer t vel wördt estrekn woerduur n zacht soeznd geluud ontsteet.

Bekeande moarkn

Internasjonaal bekeande moarkn beent:

• Ludwig
• Premier
• Yamaha
• Pearl
• Dynasty

n Hollaands moark wat espesjaliseerd is in Amerikaanse tromn is Vancore.

Disse pagina is eskreewn in t Riesns