Agnostisisme

Thomas Henry Huxley bedacht et begrip agnostisisme uutendelik.

Agnostisisme (elatiniseerde vörm van et gryksken ἀγνωστικισμός, a-gnōstikismós van oldgryksk ἀγνῶσις, a-gnō̂sis sünder weaten, sünder kennis) is et filosofiske standpunt, dat annamen – in et bysünder teologiske, dy et bestån ov neet bestån van ne hougere instantsy, byvöärbeald van nen god, betrevt – ünverklårt ov neet verklårbar bünt. Anhangers van et agnostisisme wördt agnostici enöömd.

Agnostisisme is ne werldvisy, dee in et besünder de principiele begreansdheyd van et mensliken weaten, verstån en begrip benådrükt. De möägelikheyd van et bestån van nen transcendent wean ov ne transcedente grundslag wörd neet bestreaden. Agnostisisme is so wal med teisme as ok med ateisme vereynigbår, ümdat der gelööv in god möägelik is, sölvs woneyr men de möägelikheyd van de seakerheyd  van syn bestån teagenspreakt. Net so is de upvatting, wårin ateistiske vöärstellen wårskynliker bünt as teistiske, med et agnostisisme vereynigbår. De vråge „Geavt et nen god?“ beantwöärden agnostici dårüm neet med „ja“ ov „nee“, mår med „Ik weat et neet“, „Et is neet düdelik“ ov „Et is neet beantwöärdbår“.

Geskydenis

Et begrip agnostisisme wyr in disse vörm döär Thomas Henry Huxley (1825–1895) bedacht. Skonwal et geyt üm nen noch jungen uutdrükking, is de dårachter skülende upvatting düdelik older en wördt onder andere in Rigveda, by Laozi (sjineske filosoof in den 6en eeuw v. Chr.) as ok by sofisten en eynige andere grykske vorsokråten.

Al in den 5en eeuw v. Chr. verklåren Protagoras, eyn van de vorsokratisken sofistiske filosofen van de grykske oldheyd, synen agnostisken standpunt med de wöärden:

Nen – minder erinnerden – agnostisken grundslag skynt in den vroggen romeinsken keysertyd (parallel med et begin van et vrogge christendom) in dealen van et volk verbreid ewest too wean; so leyt de skryver Petronius in synen satirisken roman Satyricon (in de scene van et gastmål van Trimalchio) den protagonist Ganymedes disse wöärden in den mond:

In den 18en en 19en eeuw leggen de filosofen David Hume, Immanuel Kant en Søren Kierkegaard kritiske teagenpositsys van de verskydene godsbewysen an den dag, wårin sy öäre twyvel gaven ov et nen definitiv, ünumstoatelik bewys vöär ov teagen et bestån van god geaven kön. De amerikånske redenår Robert G. Ingersoll wördt up grund van syne waleformuleerde tekste oaver dit tema ok as „the Great Agnostic“, „de groute agnosticus“, anedüüd.

In den 20en eeuw gealdt Bertrand Russells religykritiske proovskrivt Wårum ik gin christen bün (1927) as nen klassisk dokument van et agnostisisme. Nen låter skrivt van densölven auteur heat Am I an Atheist or an Agnostic? („Bün ik ateist ov agnosticus?“).

Varianten van et agnostisisme

Agnostisk ateisme

Agnostiske ateisten bünt ateistisk, ümdat sy neet gelööven in eyn ov meerdere goden en agnostisk, ümdat sy neet bewearen too weaten dat der gin god besteyt.

Agnostisk teisme

Agnostiske teisten bewearen neet too weaten van et bestån van nen god; dan noch gelöövt sy in eyne (ov meerdere).

Apateisme (ok „apatisk“ ov „pragmatisk agnostisisme“)

De meaning dat de vråge når et bestån ov neet bestån van god üninteressant en beteakenisloos wart. Sölvs as aen ov meerdere goden bestån, hev öär bestån feytelik gin groute beteakenis vöär et leaven van de mensheyd. Et apateisme baseert sich up meaningen van den gryksken filosoof Epikuros.

Ignostisisme

De meaning dat de vråge når et bestån ov neet bestån van „god“ beteakenisloos is, so lang as et ginne kohärente definitsy van et begrip „god“ gev. Nen ignosticus segt: „Ik weat neet wat y med et woord ‚god‘ bedoolt en kan dårüm ginne uutspråke åver dit bestån ov neet bestån doon.“ De benåming ignostisisme wyr döär rabbi Sherwin Wine (1928–2007) bedacht, den oprichter van et geselskap vöär humanistisk jöädendom. Vöärloper bünt skonwal al in de låte oldheyd too vinden.

Stark agnostisisme (ok „hard“, „esloaten“, „streng“ ov „permanent agnostisisme“)

De meaning dat et bestån ov neet bestån van goden in de båsis ünherkennbår is, vöär alle mensen en vöär alle tyden.

Swak agnostisisme (ok „week“, „oapen“, „empirisk“ ov „temporeel agnostisisme“)

De meaning dat et bestån ov neet bestån van goden vöär de oapenbårders sölv en töt et moment van de oapenbåring ünbekennt wart.

Agnostisisme en teisme

In principe bünt agnostisisme en teisme medeynander vereynigbår, want men kan in nen god gelööven, ok sünder syn bestån as verseakerd too sen (epistemiske logika, byv. gelööven as „as wårskynlik beskowen“).

Skonwal in de praktyk ståt vülle agnostici kritisk teagenoaver et gelööv in (konkrete) goden. De godsbewysen van et teisme (byv. in et jöädendom, et christendom ov de islam), et oapenbåringsweaten en de in religys oavereleaverde wunderen en wydere argumenten vöär et bestån van hougere weasens holdt når et oardeyl van agnostici by weatenskaplike beskowing gin stand. Ne godsteory, dee neet weaderelegt wörden kan, gealt in de ougen van vülle agnostici vanweagen et fålen van de falsifiseerbårheyd as ünweatenskaplik, so as in de analogy van „Russells teekan“ verdüdelikt wördt. Disse segt nåmelik nyts öäver öäre wårheyd. Sy mütt dårüm vulgens den as Ockhams skaermesse bekennde denkreagel vermeden wörden, dår sy nen ünnöydig ekompliseerde verklåringspoging wart. Vülle agnostici wyset in et besünder antropomorfe godsvöärstellingen av, ümdat öär disse too stark an de menslike kultuur en vöärstellingswerld gebunden skynet.

Eyn vörm van teisme, dee döär vülle richtingen van et agnostisme aksepteert wördt, is et panteisme, dat de werld, de natuur en et universum as 'göddelik' anwyst, sünder dår wyder nen god vöär an too wysen. Vülle filosofen, byvöärbeald Schopenhauer, sagen et panteisme skonwal as deagelik ateisme.