Woapen van Eanske

t Woapen van Eanske rechtevoort.

t Olde woapen van de gemeante Eanske.

Nen leuwe me't woapen van Eanske öp de Gedenkzoele H.J. van Heek (moakt in 1874).

t Woapen van Eanske is t woapen van de Oaweriesselse gemeante Eanske. t Olde woapen wörn öp 24 noveamber 1819 deur n Köninklik Besloet an Eanske geawn. Noa t soamen goan van de gemeenten Eanske en Lönnker öp 25 augustus 1936 wörn t woapen oard.

Blazoenerige

De beskriewige van t woapen oet 1819 was (in t Neerlaands):

"Van zilver, beladen met drie dwarsbalken waaroverheen een St.Andries kruis, formerende te zamen een slaghek, en alles van rood. Het schild gedekt met een gouden kroon en ter wederzijde vastgehouden door een klimmende leeuw."

t Oarde woapen oet 1936 kriegen n antal oarigen in de blazoenerige: de anzeende leuwe wörn ok in de beskriewige ploatst, t andrieskroes wörn deur t woard "schuingekruist" vervangen woardeur de oetenden nich mear wiedter as de boawenste en önnerste bälke gungen, en t kruusken in t mirre wörn vort-doan. Zo wörn de blazoenerige:

"In zilver een slaghek van keel, bestaande uit 3 dwarsbalken, waaroverheen 2 schuingekruiste balken. Het schild gedekt met een gouden kroon van 5 bladeren. Schildhouders : 2 aanziende leeuwen van natuurlijke kleur."

De heraldieske kleurn bint zilver (wit), keel (rood), gold (geel) en sinopel (groon).

Wegkomst

Eanske kregen öp 15 deseamber 1325 stadsrechten van de Utrechse biskop Jan van Diest. Ean van de rechten van ne stad was t maiten voren van n "stadtsigeli" (stadszeggel). t Oldste zeggel de'w kent van de stad hef t beald van n parochieheiligen, n heiligen Jakobus n Olderen. Det zeggel is töt an de Vrede van Kleef (1666) gebroekt wes, woarnoa't zeggel vervangen wörn deur n woapen met doaröp nen slaghek, det geliek is an t rechtevoortse woapen. Ok doe warn de kleurn woarskienlik keel öp zilver.

De wegkomst van n slaghek he'w nög nich vönden. t Kän nen tolhek wean, moar t kän ok ne verbasterige van t woapen van de familie Van Beveren wean. De reloasie van disse familie met de stad is doch nich dudelik.

Referensies

Dit artikel is eskreaven in et twentske dialekt van Eanske, in de Algemene Nedersaksiese Skriefwieze.