Glanerbekke

Glanerbekke in t Amstvenne.

Glanerbekke in De Glanerbrögge.

Brögge oawer de Glanerbekke tuskn Neerlaand en de Pruus.

De Glanerbekke öf Mulderinksbekke is nen ziejstroom van n Deenkel. De bekke öntspröng in t Duutse deil van t Amstvenne, net oawer de greanze met Neerlaand in t distrikt Borken in n deilstoat Noordrien-Westföale.

De bekke ström an n Neerlaandsn kaant van de greanze deur de gemeante Eanske. In de Eanskse niejbaawwiek De Eschmarke makket de bekke oet van de doar an-legde ekozone. Doarnoa vörm de bekke biej t d'rnoar vernöamndn De Glanerbrögge oawer ne längte van önnevear 2 km ne netuurlike greanze met de Pruus. De bekke mönd biej De Glaan in n Deenkel.

t Woaterskop Woaterskop Regge en Deenkel hef n gröt deil van de bekke restaureard. Hierveur he't woaterskop twea olde meanders an-kocht en öp t woatersyteam an-slötn en öp eankle plöatse n niej kreunklnd bekkeberre groawn. Vearer is d'r ne vistrappe an-legd (disse leg biej Oikos, nen wiek in De Glanerbrögge) en öp eankle pläkke laanks de euver wälskns metseld met nestelmöglikheadn veur n iesvoggel en n gealn kwikstoart öf grötn gealn kwikstoart.

Laanks de Glanerbekkewegge hef Natuurmonumenten ne nieje, breadre bekke an-legd as de hierveur nöamde bekke. Ok bint in dit niej an-legde deil n antal ziejkaantn met keain dich-legd öm boodemerosie te veurkömn. Oawer de nieje bekke bint twea brögn an-legd, woareuver de Pruus leupnd öf feetsnd binnn-goand kän wörn. Dit healn stök is in 2006 an-legd veur amfibieën as kikkern en kleaine woatersalamänder, met n hoop det d'r meardre seurte plänte goat greujn dee d'r veurhenne nich öf zoowat nich greujn, zoo-as de geale lisse, t woaterdreablad öf n vennewortel.