X

Beeldmoark van Twitter

Twitter is ne webstea woerop at leu korte berichtjes köant zetten. t Is ne webstea met as opzet sosjaal netwerk, zodet leu ne egene persoonlike ziede an köant maken en ne egene ofbeelding der biej köant zetten. Liek zo as det bievuurbeeld bie de profielstea hyves geet.

Gebroek

t Gebroeken van Twitter wörd ook wal Twitteren of tweeten eneumd, wat kwieken of tjilpen beduudt. As beeldmoark hef Twitter dan ook n kleain veugelken. Twitteren is feaitelik t biehoolden van n miniweblog, en det kan met n kompjoeter of met t mobielken.

Gebroekers geewt antwoord op de vroage: Wat doo'j? of Wat is der goans?. Ze hebt hiervuur mear 140 tekens, woerin't ze köant oetleggen wat öare gedachen zeent, of woer of ze zeent, wat ze doot, ezw. Ze köant ook in t vuurten angewen det ze oargens bie zöalt wean en doaroawer berichtjes op Twitter zett, zodet de volgers op de heugte bliewt van wat dengennigen metmaakt.

n Zied-oonderdeel van Twitter is TwitPic, wat ne ofkörting is van Twitter Picture. Met disse funksie kö'j fotoos op twitter zetten, of ze noar oew profiel steuren, zodet ze vanzelf op Twitter komt. Op disse manere kan op elk momeant van n dag niejs eplaatst worden.

Geskiedenisse

Twitter is op erichet in oktober 2006 duur Obvious Corp, n bedrief oet t Amerikaanse San Francisco. Twitter begun as n oonderzeuksproject binnen Odeo, ne webstea van t webbedrief Obvious van Noah Glass en Jack Dorsey, en was vuur t eerst te gebroeken in 2006. Twitter wun de Southwest Web Award van 2007 in de kattegerieje "blog". As daankwoard har t bestuur van Twitter n volgenden tekst: "We'd like to thank you in 140 characters or less. And we just did!" ("Vie weelt oeleu bedaanken in 140 tekens of meender. En det he'w non edoan.").

Twitter nöm machtig too, vuural duur vlotte niejsberichten noa raampen en aandere niejheden, zo as n noodlaanding van bv. Turkish Airlines vlocht 1951 en de opstaanden noa de presideantsverkiezings in Iran in juni 2009.

Vuuranstoande Twittergebroekers zeent bv. Barack Obama, Stephen Fry, Lance Armstrong en Robert Scoble. In Neerland he'j bv. minister Maxime Verhagen, en in België is Kim Clijsters drok op Twitteren.

Op 20 november 2009 leut ZDNet weten det t viefmiljärdste twitterbericht was eskrewen, duur nen Amerikaan Robert Sloan. Hee skreef ne reaksie op nen aanderen twittergebroeker: "Oh lord". Op 5 meart 2010 wör t tienmiljärdste twitterbericht verzeunden. t Was allene nit te leazen vuur de boetenwearld, umdet n Twitteraar zin profiel hef of eskoarmd. Der wör berekkend det der ongevear 600 tweets per sekonde wordt eplaatst.

In Neerlaand wör op 22 november 2009 t woard Twitteren ekeuzen as Neerlaands woard van t joar, duur t Genootschap Onze Taal.

Oetgoande verbeendige

• offisjele webstea

Bronnen / wellen: