Bob Marley

Bob Marley tiedns een van zien leste optreedns, in Zürich, 1980

Robert "Bob" Nesta Marley (6 februoari 1946 - 11 mei 1981) was nen Jamaikaansen zanger, leedkesskriewer, gitarist en aktivist. Hej was, en is n bekeandsn reggaemaker.

Zin bekeanste nummers beent "No Woman No Cry" (Nee, vrouwke, neet huuln), "I Shot the Sherrif" (Ik skeute n sherrif daale) en "One Love" (Ene leefde). Noa dat-e oet de tied köm, is dr n Album van zinne bekeandste nummers oetegiewn ("Legend") den met 12 miljoen kopiejn t meest verkochte reggae-album van de wearld is.

Vraue leawn en loopbaan

Marley wör geboorn n klean pleatsken, Nine Mile (Niegn Mijl) in Jamaika. Hej heetn offisjeel Nesta Robert Marley, mear eenn den at zin paspoort maakn mos, wisseldn ziene naamns umme. Zien vaa was nen blaankn Jamaikaansen marineoffisier met Engelse vuurooldn, den in Liverpool woondn. Den gaf Bob zien moo wal geeld, mear hej hef zik noadat Bob geboorn was nooit wier loatn zeene en köm oet de tied toew at Bob 10 joar oold was. Bob wör in zinne jeugd völle ploagnd duur blaankn, mear ook duur de zwartn, umdat-e van genne van bealn nen echen was.
Noa at zien vaa dood gung, verhuusdn-e met zien moo noar Kingston Trenchtown. Doar wör-e wier völle ploagnd um zien kluur en um ziene leankte (1,63m). Doar leardn-e zikzölf
te verdeadign, wat um naar good lukn. Doarumme kreeg-e n skeeldnaamn "Tuff Gong" (Jamaikaans Patois vuur t Engelse tough going) wat laater n naamn vuur zien eigne opnamestudio wör. Hej wör kammeröa met Bunny Livingston, den at zik laater Bunny Wailer neumn.
Toew at-e 14 wazze, gung-e van skoole en gung in de lear biej nen lasser. In ziene vrieje tied maakn-e meziek met zien moat Bunny en Joe Higgs, nen plaatseliken zanger. Den wör Bob zien leraar. Tiedns eene van disse mezieksessies wördn ze könnig met ene Peter McIntosh, den zik laater Peter Tosh neumn. Bob was van hoes oet slim Rooms, mear hee bekeardn zik töt t rastafarianisme, woervan-e n boskop aaltied vuurop de tonge har.

Meziekloopbaan

Met Bunny en Peter vörmden-e oeteandelik "Bob Marley & The Wailers". In 1973 wör eer album "Catch a Fire" in de hele wearld good oontvöngn. Zien hit "I Shot the Serrif" wör zölfs heroetegiewn duur Eric Clapton. Hee wör onmeundig bekeand in zowat de hele wearld, mear vuural in Afrika.

Wietere leawn

In 1977 wör Bob op enömn in t zeeknhoes en wör ne staarke vorm van kaanker in zienen grootn tei biej um kostateerd. Dat was vuurt ekömn oet n weundjen wat-e bie n voetbal har ekreegn. Hej wol zik n tei neet loatn ofsniedn, umdat zien Rastafari-geleuf dat neet tau leut. n Kaanker zeaidn toew oet noar ziene harsens, longn, leawer en ziene maage. Tiedns zienen lesten wearldtoer, toew at-e in Amerika was, stortn-e in toew at-e n stuksken gung hardloopn. n Toer wör drekt of ebloazn.

Toew at-e van Duutslaand noar hoes (Jamaika) vleug, wör-e neet good. Ze beent toew elaand in Miami, Amerika, woer at-e in n zeeknhoes is oawerleedn. Bob Marley is 36 joar oold ewördn.

Oetgoande verbeendege

• www.bobmarley.com webstea oawer Bob Marley, van zinne femilie

Disse pagina is eskreewn in t Eanters