Liefeigenschop

Uut Wikipedia, de vrye encyklopedy

Liefeigenschop is nen vorm van heurigheid dee kort bi-j slaverni-je steet. Et verskil is veurnoamelek dat liefeigenen n gezin konden stichten (wat met slaven lang neet altied et geval was), n stuksken laand mochten bebouwen um eur gezin te voden en neet zunder eur gezin en eur laand konden wodden verkocht.

De verskillende vörmen van unvri-jheid bunt neet altied dudelek uut mekare te holden. Pachterschop, share cropping, peonage, schuldslaverni-je, heurigheid, liefeigenschop en slaverni-je vleujt in mekare oaver. Ok is et neet zo dat grotere unvri-jheid altied grotere ellende metbreg, en meer vri-jheid meer welvoart. Völle slaven wödden in verholding good evood en eklaed, moar völle pachters - as eure akkers klein waren en pachten te heuge - in bittere armeu laefden.

Ok is et zo dat formele rechten mangsmoal neet völle zegt. Den formelen rechtstoostaand van nen boer in ne bepoalde samenlaeving kan in verholding vr-j good waen, moar as zienen landheer tegeliekertied den plaatseleken rechter is, zal den boer in warkelekheid neet völle meugelekheden hebben um ziene rechten te doon gelden.