Broenehaar

Hoes op Broenehaar

Broenehaar of Broenehoar is ne boerskop in de gemeente Tweanteraand in Tweante. t Lig vief kilometer noar t noorden van t Vjenne, kort bie Langevenne. t Hef ongevear 151 inwonners. t Ligt op nen hoar, ne zaandrugge in t laandskop.

Geskiedenisse

In oolde geskriften wörd Broenehaar Broune haer en later de boerskop Bruyne Haer eneumd. t Heurden vroger töt de Heerlikheaid Almelo. Broenehoar is wat ligging angeet één geheel met de Striepe, det in de Groafskop Beantem ligt. t Is t oeteande van ne lange heuwelrugge in t midden van wat eartieds laank estrekte vennen warren, dee't later oontgunnen wörden. Joarenlaank was de heade van Broenehaar t weadegebeed vuur sköape van t klooster van Sibculo. Doarnoa kömmen de sköape van de leu van Broenehoar en de Striepe der te weaden, noar oold recht. t Oorsproonkelike laandskop is duur meanselik haandelen slim veraanderd, vuural duur sköapeweades, bemesting, vervenning en oontginning.

Oawer greanze tusken Oaweriessel en Beantem is vroger vake esteggeld, mear bie Broenehaar hef t aait dudelik ewest. t Eerste geskrift (zoonder doatum) det bekeand is oawer t oflopen van de limiet (greanze) is van um de 1610, en ne bevestiging der van is oet 1677. Der wör fleenk oawer de greanze oonderhaandeld tusken 1740 en 1770, toew at keuning Willem IV dee regearen, den at duur zin trouwen met Anna van Hannover de Groafskop Beantem in behear kreeg. Hiernoa wörren de greanskeies too ezat. In 1779 wör greanspoal 99 eplaatst, den't de skeaid angavven tusken Beantem, Tweante en Sallaand. t Was ja feaitelik n dreelaandenpeunt.

In 1711 wör vuur t eerst probeerd op Broenehaar te bouwen, mear hellige boeren oet Geesteren en Maander treuken t eerste hoes tegen de vlakte, umdet zee meanden t recht op de weadegroond te hebben. Elf joar later, in 1722 probeerden n Groaf van Almelo t nog n moal, en det lukten. Woer of det ewest hef, is nit bekeand.