Banjo

Uut Wikipedia, de vrye encyklopedy
Banjo met vief snaren

n Banjo is n snaarinstrumeant wat oontwikkeld wör duur Afrikaanse slawen in de vraue Verenigde Stoaten. n Banjo is ofleadt van verskeadene ooldere afrikaanse instrumeanten. t Instrumeant hef n kort, houwerig, skaarp geluud. Van n namen "Banjo" wörd duur mekaar annömmen dat t ofleadt is van t kimboendoe-woard mbanza. Wat gelearde leu meant dat t ne verbastering is van t woard "bandore" of van ne vraue verengelsing van t Spaanse woard "bandurria". Wier aanderen geleuwt dat t oet t gebeed van Senegal en Gambia keump en ne verbastering is van n woard vuur bamboestengel, wat völle wör gebroekt vuur n haals van de banjo.

Geskiedenisse[bewark | bronkode bewarken]

Slawen in t noord-oosten van de Verenigde Stoaten maakten instrumeanten met ne kalebasvörm, wat ze gewoon warren oet Afrika. Skriewers oet t 18de en 19de joarhoonderd beskrewen t instrumeant oonder mear as bangie, banza, banjer en banjar. Der bestoat völle instrumeanten dee't völle op n banjo liekt, zo as bievuurbeeld n Japansen shamisen en Pärziesen tar, of aandere soorten dee't völle in aandere laanden gebroekt wörden. Toch is de meest vuur de haande liggende vuuroolder van de banjo de ankonting. n Soort lute dee't duur de Jola-stamme oet Senegambia gebroekt wörd. Aandere vergeliekboare instrumeanten beent de xalam oet Senegal en de ngoni oet t Wassoeloegebeed, det verpreadt ligt oawer de laanden Mali, Guinee en Ivoorkuste.

t Is an te nemmen dat n banjo oawer verkillende wearlddelen is egoane, en oonderwiel verskillende moalen is an epast duur de joaren hen. n Hudigen banjo wör geleefd emaakt duur n Amerikaan Joel Sweeney. Den treuk dr in de dartiger joaren van t niegenteende joarhoonderd met roond. Banjoos wörden tusken 1840 en '50 noar t Verenigd Keuninkriek oawer ebracht, en wörden doar slim geleefd.[1]

Ene den't n banjo in Tweante bekeand maakten, was Harm oet Riessen, bievuurbeeld in zien nommer I am ben n Kentucky Tukker. Wieder wörd n banjo in verskeadene nommers van n Achterhooksen boerenrockband Normaal gebroekt. Ook n Dreantsen zänger Daniël Lohues löt regelmoatig nen banjo in ziene muziek wierkomn.

Hudigen vörm[bewark | bronkode bewarken]

n Hudigen banjo besteet in n antal vörme, zo as met vere of met vief snaren. De interesse vuur banjoos met zes snaren neamp ook tau. Dissen banjo is stemd as ne gitaar. In zowat alle vörme wörd n banjo bespöld duur in ne vlotte arpeggio-wieze van spöllen, skoonwal der völle verskeadene spölwiezes beent.

De kaste of "pot" van n modernen banjo besteet normaalgesprökken oet nen roonden raand (meesttieds van hoolt), ne metalene toonreenk, en n vel deroawerhen espönnen, te vergelieken met n tromvel. Van ooldsher wör t vel emaakt van t vel van deers, mear rechtevoort kan dat ook keunststof wean. Wat banjo's hebt n trilvel an de achterkaante, mear de meeste beent lös van achteren. Der bestoat ook ellektriese banjo's.

Gebroek[bewark | bronkode bewarken]

Rechtevoort wörd n banjo as kenmaarkend ezene vuur Dixieland Jazz, country-, folk en bluegrassmuziek. t Instrumeant was skoonwal al belangriek in de Afrikaans-Amerikaanse tradisjonele muziek. Featelik keump t der op dale dat Afrikaanse Amerikanen ne grote invlood harren op de oontwikkeling van de country en bluegrassmuziek duur n banjo der in te gebroeken, en duur de verbettering en anpassing van spöltechnieken. De leste tied wörd n banjo völle gebroekt in völle muziekstielen, zo as popmuziek, indie rock en Keltiese Punk.

Oetgoande verbeendings[bewark | bronkode bewarken]


Wikimedia Commons Commons: Banjo - plaatjes, filmkes en/of gelüüdsbestanden.
Bronnen / wellen:
  1. Informasie oawer n banjo en oontwikkeling van de Sieter-banjo.