Slag op de Hardenbargerheade

Uut Wikipedia, de vrye encyklopedy
Nå navigaty springen Nå söken springen
Slag op de Hardenbargerheade.

De Slag op de Hardenbargerheade (ook wal es den Vergettenen Veeldslag eneumd), was nen veeldslag in den Tachtigjoarigen Oorlog. De Slag wör eheulden op 17 juni 1580 op de heade bie Hardenbarg tusken een Stoats leager van Filips van Hohenlohe en Spaanse leagers. Hierbie kömmen mear as 1600 soldoaten oet de tied.

Verloop[bewark | bronkode bewarken]

De eerst poar joar har et Saksiese deel van wat noe Nederlaand is nog niks gen last van den Tachtigjoarigen Oorlog. De watergeuzen vöchten veer joar laank an de kuste, vuurdet ze pas bie Den Brielle nen voot an wal kregen.

Op den darden meert van 1580 keus Stadholder Sjors van Lalaing (Groaf van Rennenbarg) vuur de Spaanse kaante. Umdet den regeerden oawer Grönningen, Freeslaand, Dreante en Oaweriessel, warren de Stoatsen bange at alle Saksies-Nederlaandse steaden (met ne Roomske meerderheid) zin vuurbeeld volgen zollen en den opstaand van de Stoatsen neet meer zollen helpen. Doarumme beleagerden de Stoatsen Grunnen moandenlaank, woarbie as ze alle hulpe gebroeken konden. Filips van Hohenlohe, nen leagerbaas, wol gearne trouwen met de dochter van Willem van Oranje. Det köm Van Oranje good oet. Hee veund et good, as Van Hohenlohe um helpen zol met alle vechterieje. Hohenlohe was net in Oldenzel en wör op 15 juni op ereupen um met et beleg van Grönningen te helpen.

Van Hohenlohe en zinne kavalerie maakten at he doarhen köm, mer bie Koevorden heurden ze van et volk at der nen trop Spanjaarden oonder Maarten Schenk van Lingen noar Zwolle treuk. Doar warren de Zwollenoaren tegen den keunink in et gewear ekömmen. Hee dreeiden rap umme met zin leager en gung op Hardenbarg an. Op de venebrugge, een dreug stukke laand tusken twee moerassen bie Hardenbarg (rechtevoort ne boerskop van Hardenbarg), tröffen de beide leagers mekaar. Hohenlohe heuld der gin rekkening met at zinne soldoaten doodmeu warren van et völle vechten en reaizen. Et leager begun dus al meu an de stried.

Stried[bewark | bronkode bewarken]

In den noamiddag van den 17den juni 1580 beskeut Hohenlohe et leager met kanonnen. Nen koppel Spaanse speerruuters wörden meteen eraakt. Doarumme nöm ne aandere spaanse eenheid de bene. Hohenlohe steurden der zinne ruuters achteran. Doarmet kömmen ze tusken de Spanjaarden en wörden ze umsingeld. 1500 van Hohenlohe's soldoaten kömmen oet de tied, terwiel as Schenk meender as 100 man verleus. Hohenlohe zelf en nog een antal aanderen wussen vort te kommen.

Noasleep[bewark | bronkode bewarken]

Leagers kregen aait slecht betaald, of mangs helemoal neet. Um det op te vangen, bestöllen en pleunderden de soldoaten regelmoatig de boeren in de buurte, woerbie't ze ook fleenk zeupen. Vuur et gewone volk maakten et neet oet wee der tegen wee vöcht. De boeren harren der fleenk den boek van vol at ze verdan oawervöllen wörden duur soldoaten en begunnen öar egene leager; de Wanhopigen. Bie Gramsbargen treuf Van Hohenlohe's vluchtende leager een köppelken van dee Wanhopigen. Met stökke, zeasen en heuivörken vleugen ze Von Hohenlohe's leager an. Det gung öar eerst good of, mer Van Hohenlohe's leager wus zik te herpakken en slachten 700 boeren of tusken Deutekom en Roalte. Hee treuk noatieds nog joaren duur Tweante, Sallaand en den Achterhook en leut steaden as Almelo, Dealden, Goor en Deepn ofbraanden.