Sam Altman

Samuel Harris Altman (geboaren up den 22. april van 1985) is nen amerikaansken underneamer, investeerder en höyvd uutvoring van OpenAI seyd 2019. Hee wördt seen as eyne van de anvöörders van de AI-revoluty.

Nå twey jår an de Stanford University gavven Altman et der an en stichteden Loopt, ne mobile sociale netwarkdeenst. Hee harkeden der meyr as 30 miljoon dollar an investeringen vöär by mekander. In 2011 güng Altman by Y Combinator, ne grupe investeerders wat nye bedryvkes voordhelpet. Dår was he vöärsitter van, tüsken 2014 en 2019. Dårnå wör he CEO van OpenAI. Under syne leiding wör in 2022 ChatGPT lanceerd. In 2023 tröäd den råd van bestüürders em der uut ümdat se em gin leider genog vünden, mär vyv dage later was he der weader ümdat medwarkers en investeerders up de achterste beyne kümmen warren. Dårup wör nen nyen råd förmed.

Hee is vöärsitter (eweasd) van bedryve in skoune energy, sou as Helion Energy en Oklo (töt april 2025). Dee bedryve solden nöydig weasen üm de tonöämene vråge nå energy an te künnen ümdat künstklokede årdig wat stroum vreat. December 2025 wördt syn vermögen skatted up sou'n 2 miljard dollar. In 2025 wör hee vöärdraegen vöär Time's Person of the Year as eyne van de 'Architekten van AI'.

Persöönlik

Altman düt al seyd synen kindertyd gin vleisk eaten. Hee valt up kearls, wat he up syn 17. bekend makeden up skole. Wat van syne klasgenouten saggen et neet sitten at der eyne vöär Nationale Coming Out-dag sol kummen spreaken, en do spröäk Altman up. Neagen jår hadde hee verkeyring med Nick Sivo, meduprichter van Loopt. Nå de oavername in 2012 güngen se uut mekander.

Volgens biograaf Keach Hagey tröf Altman syne tokomstige echtgenout Oliver Mulherin 'by Peter Thiel in et bübbelbad üm dree üür 's nachtes.' Mulherin was nen student komputerweatenskappen an de Universiteit van Melbourne. Later wör he nen ingeniöör en warkeden an australiske kunstklokedeprojekten, vöärdat he nå de VS ümtröäk en vöär et startende bedryv SPARK Neuro güng warken. January 2024 trouwden de beide kearls up öär landgood in Hawai. Deyls woanet se in San Francisco's Russian Hill-büürde. Ouk sint se vake in Napa, Kalifornie to vinden.

Altman en Mulherin geavet vöäle vord an gode dolen. Se hebbet nen söäne, geboaren in 2025. Altman geyt der vanuut at de wearld in syn leaven noch sal vergån en düt sik vöärbereiden. In 2016 sea hee: 'Ik hebbe gewären, gold, kaliumjodine, antibiotika, batteryen water, gasmaskers van et israeliske leager en ne flinke lappe grund in Big Sur wåras ik henvlegen kan.'

January 2025 klaagden Altman syn süster Ann em an vöär seksuääl misbruuk. See segt at hee öär misbröäk do as see dree was en hee 12. Syn moder en dree bröders hebbet ne deylde verklåring aflegd wårin as se segget at der 'gin bal van kloppet.'

Altman wördt seen as beste möäge med Peter Thiel.