Rob Jetten
.jpg)
Rob Arnoldus Adrianus Jetten (Veghel, 25. määrt 1987) is nen neaderlandsken politiker. Seyd den 12. augustus 2023 is he partyleidsman van de D66 en seyd den 6. december 2023 mag he medküeren in den Tweyden Kamer. Tüsken january 2022 en juli 2024 was he minister van Klimaat en Energy. In et lätste halv jår der van was he ouk vicepremier. By de Tweyde Kamerverkesingen van 2025 wüst he syne partye de grötste winst ooit te besörgen.
Jetten wör jung in Uden. Nå et vwo van et Udens College güng he hen Bestüürskunde studeren an de Radboud Universiteit van Nymeagen. Hee löyp stage by ProRail as managementtrainee en möäg der blyven warken as regiomanager Bouwmanagement vöär Noord- en Oustneaderland.
Politike loupbane
[bewark | bronkode bewarken]Tweyde Kamer
[bewark | bronkode bewarken]Jetten begünde syne politike loupbane as beleidsmedwarker vöär de D66-afvaerdiging in de Eyrste Kamer van de Ståten-Generaal en as vöärsitter van de Jonge Demokraten. Dårnöäst warkeden hee noch tüsken 2010 en 2017 as rådslid en fraktyvöärsitter vöär de gemeynde Nymeagen. By de Tweyde Kamerverkesingen van 2017 wör he köäsen in et neaderlandske parlement. Hee güng uut name van syne frakty oaver klimaat, energy en gas, spoor, demokratiske vernying en ekonomiske saken. Jetten hevt medehülpen den Klimaatwet döär te voren.
In 2015 tröäk sik partygenout Gerard Schouw de pöäle uut de Tweyde Kamer. Den hölde sik gangs med ne wetswysiging wårmed as den Köäning niks meyr te seggen hevt oaver et verkesen van Kommissarisse van den köäning en börgemeisters. Jetten nöäm et do van Schouw oaver. Syne tweyde leasing van de Initiatiefwet 'deconstitutionalisering benoeming commissaris van de Koning en burgemeester' kreag 147 van de 150 lüde in den Tweyden Kamer med. In den Eyrsten Kamer güngen 57 teagen 11 stemmen der in med, wårmed as den Grundwet anepasd wörde.
As Tweyde Kamerlid warkeden hee samen med et landelik bestüür van D66 en de Mr. Hans van Mierlo Stichting an ne ryge vöärstellen vöär demokratiske vernying under den titel 'Democratie van nu'.
Up den 9. oktober 2018 wör Jetten köäsen as fraktyvöärsitter van de D66 in den Tweyden Kamer, as upvolger van Alexander Pechtold. Dårmed was he den jungsten vöärsitter ooit. Partyleider wör he noch neet, dat wör Sigrid Kaag.
Ministerskap
[bewark | bronkode bewarken]By et kabinetsformeren in 2021 en '22 was Jetten tweyden man vöär Kaag. Up 10. january 2022 wör he inewyded as minister vöär Klimaat en Energy in et kabinet Rutte IV.
By ne Klimaatkonferency in Dubai in 2023 up den 9. december seade hee at Neaderland ne samenwarking van twaalv landen solde förmen üm geldtoslage up fossile brandstoffen af te bouwen.
Partyleiderskap
[bewark | bronkode bewarken]2023-24: partyleiderskap en weaderkumst in de Tweyde Kamer
[bewark | bronkode bewarken]Up den 13. juli 2023 skeidden Kaag der uut as leider van D66. Nen dag later tröäd Jetten nå vöärden üm sik kandidåt te stellen. Up den 12. augustus wör hee lysttrekker by de Tweyden Kamerverkesingen van 2023 en dårmed upvolger van Kaag. De partye güng van 24 nå 9 seatels. Jetten küm in de Tweyde Kamer. Kaag tröäk sik anvang 2024 heylemål terügge uut de neaderlandske landelike politik. Jetten nöm tydelik et Ministerie van Financiën oaver. Sou wör hee den nyen demissionair eyrsten vicepremier. Up den 12. january wör steven van Weyenberg ansteld as den nyen Minister van Financien. Do as up den 2. juli van 2024 Kabinet-Schoof ansteld wör, bleav Jetten Tweyde Kamerlid en fraktyleider.
2025-nu: weaderverkesing en winst
[bewark | bronkode bewarken]Up den 28. juni 2025 köäsen de D66-leaden Jetten vannys as lysttrekker, vöär de Tweyde Kamerverkesingen van 2025. Hee wüst de D66 17 seatels derby te versyren, wårmed as et totaal up 26 uutküm, et höygste van de partye ooit. Meanigeyne meynt, Jetten sal wal den nyen premier van Neaderland worden.
Persöönlik
[bewark | bronkode bewarken]Jetten hevt verkeyring med internationalen tophockeyspöäler Nicolás Keenan uut Argentinie. Up den 26. november 2024 verloavden sik et stel. Se willet trouwen in Spanje in 2026. Up den Internationalen Dag teagen Homofoby en Transfoby van 2020 löäs Jetten oaver Twitter en paar haatberichten vöär wat he kreagen hadde ümdat he homoseksuääl is.
Nåjår 2025 döäde hee med an et televisyprogramma De slimste mens (Et Klookste Menske), wårin as hee up de darde plaatse uutküm.
Jetten woant mangs in Den Haag, mangs in Ubbergen. Üm 2014 kreag he last van den rikketik. Seyd den tyd löpt he med nen chip in de börste üm syn härte te bewaken.