René Karst

René Karst (Et Hougeveane, 13. augustus 1966 – dår, 21. november 2025) was sanger in et neaderlandsk en drentsk.

Loupbane

René Karst dea uptreaden vanaf 1979. Hee dea eyrst samen med syn moder, sangeresse Jannie Karst-Dubbelboer, as Duo Karst. Under platenmakers Dukarec (ne samentrekking van Duo Karst Records) makeden Karst up dartig cd's hunderden eygen nummers. Dat slöög by vöäle uuttrekkers nå Kanada en Australie an. Ouk makeden hee de nummers vöär syn süster Erikah Karst, den as ouk sangeresse was.

Tüsken 2006 en 2008 sat Karst in et Hougeveane in den gemeynderåd vöär et CDA. Do as syne solo-loupbane van de grund begünde te kummen, skeidden hee dårmed uut. In 2007 gavven hee twey feystnummers uut: Supergave tijd en Dat moet je niet doen. Beide nummers stünden up syn eyrste soloalbum, wat ouk Supergave Tijd heat. In 2008 küm synen single Ik wil zo graag weer 20 zijn uut. In 2009 volgden de nummers Nooit om de liefde huilen, Naar jou, Op de tafel dansen en Wat een feest. In 2010 gavven hee med Marlous Oosting et duet Ik wil een kerstboom versieren met jou uut. Dårup volgden et nummer De deur van de kroeg in 2011, wat en vöäruutblik was up syn tweyde album Hellup, wat up den 3. juni van dat jår uutküm. In dat jår langden hee ouk med syn süster Erikah en nummer an vöär et Eurovisiesongfestival. Et küm der neet döär.

Den 21. määrt 2014 tröäd Karst vöär et eyrste up med nen eygenen band. Up den 1. oktober dea hee ouk nen winkel vöär knüffelbears lös. Dår had he ouk en teaterken achterebouwd, wåras he vöärstellingen vöär kinder gavven.

Anvang 2016 warkeden Karst samen med DJ Bart an et nummer Hollanders. Mei 2016 küm Karst up vakanty kollega-sanger Stef Ekkel teagen en ne koppel kameröäde uut Twente. Dee hadden as motto 'Lever te dik in de kist as weader en feystke misd', wat em inspireerden töt en ny nummer: Liever te dik in de kist wör nen behöyrliken hit in de hollandske feystscene.

Vöärjår 2018 güng Karst ses mål döär drentske teaters med Carola Smit en Dick Plat. De koncertryge had as titel Letter voor Letter. Et was bedoold üm andacht to vrågen vöär leasen en skryven. 2019 en 2020 güng he der ouk med Oaveryssel in. End 2019 wör Karst ambassadöör van de Stichting Lezen en Schrijven.

Vanaf den tyd was Karst voordan vaker to seen in spelshows vöär tealevisy. Määrt 2024 kreag Karst ne goldene plate vöär syn album Atje voor de sfeer en andere sfeermakers van 2019. Et was syn sesde goldene plate.

Ouk probeerden Karst syne feystnummers an Düütskland to verkoupen. Hee satten syn nummer Het interesseert me geen ene reet van 2022 ümme nå Hallo, hallo, das ist mir scheissegal. Ouk skreav hee in 2024 en nummer Hoogev1 vöär syne woanplaatse. Seyd 2024 was hee ambassadöör vöär de CliniClowns.

Up den 21. november 2025 küm Karst unverwachts uut de tyd. Hee störv med 59 jår an nen hartstilstand terwyl as hee slööp.