Rüggengråt

De verskeidene underdeylen van ne warvelsule.

Den rüggengråt (in twentsk ouk wal den rüggenstrank enöömd) of warvelsule is deyl van et geraamde van warvelde sougdeers. De warvelsule is wåras de warvelden öären name an te danken hebbet. Et besteyt uut 33 butblükke, de warvels, dee de rüggenseanuwbane umslutet en sou beskarmet. Der tüsken sittet warvelskyven en gewrichten van knars. Et höygere deyl heat et dorsale deyl en dår sit et rüggenkanaal, ne langwarpige hulte den untsteyt döärdat de warvels nå buten hen eböägen ståt. Et ümvat en beskarmt de rüggenseanuwbane. Seanuwendingen steaket uut de tüskenwarvelgäter, wårdöär as en leavend weasen gevööl in alle uutenden van et lyf hevt.

Sou'n 50 dusend soorten deers hebbet nen rüggengråt. Den van de menske is et beste undersöchted, ümdat den groutendeyls etselvde in mekander steaket as alle andere sougdeers, kruupdeers en vöägel. Den förm kan wal wat afwyken.

De verskillende warvels hebbet allemål nen eygenen name, afhangelik van öäre steade in den nekken, de börste (thorax), den buuk (abdomen), skaamstreake (pelvis) of start. Den rüggengråt drükket et vel nå buten. Dåran künnet artsen seen wår of se müt weasen vöär ingreapen as rüggenprikken en margafnames.

Et gevt nen heylen rits andoningen an den rüggengråt, sou as kyfose, skoliose, ankylose spondylitis en skyvafbraak. By geboarde kumt de afwyking spina bifida et vaakst vöär.