Pluribus

Pluribus (weaderegeaven as PLUR1BUS) is ne amerikaanske scifi-televisyryge eskreaven döär Vince Gilligan, vöär Apple TV. Et spölt sik vöärnamelik af in Albuquerque in den ståt Nymeksiko. Et verhaal volget skryvster Carol Sturka (Rhea Seehorn), den as as eyne van en händkevul oaverblivt nådat en butenaerds virus de rest van de menskheid ümmedrait in ne vreadige lykdenkende immenkorv, mär toch probeert eyr uutendelik ouk te draien.

Pluribus küm up 7. november 2025 uut up Apple TV. Ne tweyde ryge is in de maak. Den titel verwist nå et latynske e pluribus unum (uut meanigen eyn), et motto van de Vereynigde Ståten. Recensenten sint wys med Pluribus. Se doot van Gilligan syn skryvwark en Seehorns akteerwark. Ouk magt se lyden wo originääl de ryge is en wat vöär stylinvloden der in sittet. Et is vöäredraegen vöär twey Golden Globe- en twey Critics' Choice-pryse.

Verhaal

Pluribus volget skryvster Carol Sturka uut Albuquerque. See is eyne van mär 13 lüde up de wearld dee immuun is vöär et 'Eynwörden', ne geböärdenisse wårby en butenaerdsk virus de rest van de menskheid hevt veranderd in de 'Anderen,' ne vreadige en gelükkige hive mind (in gedachten med mekander verbünden). Den vreadigen menskenbund düt allens wat Carol en de rest van de unbesmetteden mär vråget, mär geavet to dat se dee der uutendelik ouk by willet hebben. Carol geyt drivtig up söök üm et weader ümme to draien.

Spöälers

Höyvd

• Rhea Seehorn is Carol Sturka, ne amerikaanske romantiske fantasyskryvster den et Eynwörden probeert teagen te gån
• Karolina Wydra is Zosia, ne poolske Andere den Carol syne geleevde wördt
• Carlos-Manuel Vesga is Manousos Oviedo, nen kolombiaansen immunen den in Paraguay wont en alle kontakt med de Anderen uut de weg geyt

Gäste

• Miriam Shor is Helen L. Umstead, Carol's manager en vrouwe
• Samba Schutte is Koumba Diabaté, ne mauritaansken unbesmetteden den as der van neamt nå et eynworden
• Menik Gooneratne is Laxmi, ne indiaske unbesmettede den as et neet best med Carol kan vinden
• Darinka Arones is Kusimayu, ne peruaanske unbesmettede dee as sik vrywillig by de Anderen anslut

Untvangst

Pluribus is breyduut good untvangen. Recensenten hebbet et van Seehorns akteerwark, Gilligan syn skryv- en digireerwark, en wo origineel den toun en styl van de ryge sint. Up den stemmensammelder Rotten Tomatoes krigt de ryge 98% goodköäring up basis van 157 recensys. Volgens de websteade is et 'Uprecht originääl science fiction-wark van televisy-oldgedeenden Vince Gilligan. Med Pluribus geyt Rhea Seehorn döär ne gedörvde nye wearld med heyl wat herhalingen.' Volgens peiler Metacritic krigt de ryge ne skore van 87 uut 100 up grund van 38 recensys. Volgens öär krigt et 'lov alum'.

Tema's en styl

By et uutdenken van de ryge gebröäk Gilligan stylfiguren uut eyrer scifiwark, byvöärbeald uut The Twilight Zone en den film Invasion of the Body Snatchers uut 1956 vöär et afbealden van lüde dee van butenaf bestüürd wordet.

Verskeidene recensenten seet verskillende stylköäses en filosofiske undertounen. Sean T. Collins van Decider süt verskillende scifi- en horrorwarken weaderümme in Pluribus. Volgens em was et ouk ne 'weaderuutgave med ne dikke knippe' van The Prisoner. James Poniewozik vergelikt et med The Leftovers, The Twilight Zone en The Last Man on Earth. Volgens em hevt Gilligan heyl wat afekeaken van The X-Files en The Lone Gunmen, wåras Gilligan selv ouk an medewarked hevt. Pluribus wördt ouk wal vergeaken med Severance, ne andere scifi-ryge van Apple TV wårby lüde et bewüstheid veranderd kryget.

Volgens wat kritikasters is et verhaal en kommentaar up et in dissen tyd spöälende gedo rund künstklookde. Poniewozik süt oavereynkumsten tüsken de ryge en de 'moderne antrekkingskracht van AI, wat vöäruutgang beloavt vöär de minimale prys van alle menskelike klookheid in eynen gehöyrsamen geyst'. Ouk Josh Rosenberg van Esquire meynt, Pluribus is ne allegory vöär et sinseyke klakkelouse anneamen van künstklookde döär de menske. Volgens em 'see'w endelik es en vöärnaam verhaal oaver unse verbinding med AI wat neet blout geyt oaver der in medgån of et kaput willen hebben.' Gilligan selv is grout teagenstander van AI en ouk in de aftiteling van Pluribus steyt dat de 'ryge maked is döär lüde.' Tegelyke gevt Gilligan an dat hee neet an AI dachteden do as he Pluribus skreav, ümdat et idee al acht jår eyrer köm.

In de ryge kümt selv ne vergelyking te språke van de assimilaty van de unbesmetteden en konversyterapy. Ouk sint der verskeidene weasd dee lykenis saggen tüsken de uutwarking van et butenaerdske virus en de COVID-19-pandemy. Volgens Kayla Kumari Upadhyaya van Autostraddle kikt de ryge ouk nå kolonialisme: 'den eyngeyst kö'w seen as ne ekstremen form van assimilaty, wårin alle kulturele verskeidenheid an de kante geyt vöär eyne homogene monokultuur.'