Pan-African Payment and Settlement System

Et Pan-African Payment and Settlement System (PAPSS) is en afrikaansk realtime gross settlement-stelsel wat interafrikaansen handel med verskillende münten möägelik maket. De Afrikaanske Uny en de Afrikaanske Export-Import Bank (Afreximbank) gavven et uut in 2022 üm handel makkeliker to maken in de Afrikaanske vryhandelsstreake (AfCFTA). Teagen et ende van 2024 sol et ouk in de Kariben uuterold worden.

Insat vöär PAPSS is afhangelikheid van den amerikaansken dollar verkleinen. Vöär at PAPSS bestünd müst yderen oaverdracht tüsken afrikaanske landen eyrst langs de Vereynigde Ståten, dee as der steyds en percentage van medkreagen. Dat dreyv de kösten machtig up (mangs wal dartig procent) en et duurden mangs ne weake vöär nen oaverdracht verwarked was. Dat makeden interafrikaansken handel håste unbetaalbår en uninteressant vöär kleine bedryve. Med PAPSS kan et rechtstreyks tüsken afrikaanske landen en sit der nen toslag up van up syn meyst dree procent. Goodköyper en gauwer.

Wo as et warket

Sou warket PAPSS:

1. En bedryv düt ne betaling via öäre lokale banke of andere betalingsdeenst
2. De betaling geyt via de centrale landsbanke nå PAPSS
3. PAPSS kikt nå of allens kloppet
4. PAPPS stüürt et döär nå de centrale banke van et untvangende land
5. Van dåruut geyt et wyder nå de lokale banke van den untvanger
6. PAPSS gevt by- en afskryvingsupdrachten nå de centrale banken van den betaler en untvanger
7. Dee maket der hard geld van, med Afreximbank as vöärsketer
8. As dat is aferunded hevt den untvanger et geld in syn eygene münte

PAPSS verwarket dageliks rund middernacht uutwesselingen tüsken verskillende afrikaanske münten. Centrale banken vüllet dan et verskil an. Et betalings- en balanceringsproces begint alle dage vannys.

Geskedenisse

PAPSS wör vöär et eyrste nöömd up den 7. july van 2019 by de 12. Butengewoane Sitting van de Afrikaanske Uny in Niamey in Niger. Et begünde as en probeerproject tüsken ses landen in de Westafrikaanske Monetäre Zone (WAMZ). In 2023 begünden verskeidene karibiske landen der ouk med to spöälen, üm handel tüsken de Kariben en Afrika to understütten. Undertüsken had de Afreximbanke de Karibiske streake aneweasen as sesde afrikaanske streake under diaspora en en kantoor lösedån up Barbados. PAPSS sol in 2024 oaver alle karibiske landen uuteruld worden dee ne oavereynkumst med Afreximbanke teykend hebbet. In 2025 wör düdelik at de karibiske streake selv eyrst nen CAPSS uutrullet, en Caricom Payment and Settlement System, wat ne ekstra låge seakerheid inbouwt.

Wee med düt

November 2025 warren der de volgende banken by:

• Bank of Ghana
• Central Bank of Nigeria
• Central Bank of Liberia
• Central Bank of the Republic of Guinea
• Bank of Sierra Leone
• Reserve Bank of Zimbabwe
• Central Bank of Djibouti
• Bank of Zambia
• Central Bank of Kenya
• Central Bank of The Gambia
• Central Bank of Tunisia
• Central Bank of Egypt
• Central Bank of the Comoros
• Reserve Bank of Malawi
• Bank Al-Maghrib
• Bank of Algeria
• National Bank of Rwanda
• Bank of the Republic of Burundi