Ozzy Osbourne
John Michael "Ozzy" Osbourne (3. december 1948 – 22. july 2025) was nen britsken sanger, leedkesskryver en bekenden persoon den as den heavymetalband Black Sabbath in de beynen hülp in 1968 en der as höyvdsanger in de jåren '70 med döärbröäk. Vöärin de jåren '80 vörmden he syn eygenen band. Hee nöömden sikselv de 'Prince of Darkness' (Prince van de Düüsternis).
Up Black Sabbath öär eyrste acht albums was Osbourne sanger. De band vünd heavy metal uut, vöäral med de albums Black Sabbath en Paranoid (beide in 1970) en Master of Reality (1971). In 1979 wör Osbourne uut den band esmeaten ümdat he voordan under invlood was van alkohol en andere verdöyvende middelen. Med Randy Thoads en Bob Daisley förmden hee nen eygenen band, wårmed as he de albums Blizzard of Ozz (1980) en Diary of a Madman (1981) upnöäm. Osbourne gavven darteen studioalbums uut, de eyrste söäven dårvan haalden multi-platinum in de Vereynigde Ståten. In de jåren '80 rakeden hee in upspraak üm syn gedrag up en nöäst et podium. Et kristelik-rechtse deyl van de bevolking meynden, hee sol satanisme preydiken. Verskeidene målen küm hee weader by Black Sabbath torügge, tüsken 1997 en 2005 en weader in 2012. By dee tweyde weaderkeyr süng hee ouk et studioalbum 13 in (2013). Dårnå güngen se up afskeidstocht den as duurden töt 2017. Up den 5. july 2025 tröäd Osbourne vöär de lätste mål up, up et Back to the Beginning-concert in Birmingham. Hee had al anekundigd dat he der med uutskeidden ümdat he med de gesundheid an et köykelen was, al wul he noch wal mangs wat upneamen. Söäventeen dage later, up den 22. july 2025, küm Osbourne uut de tyd.
Osbourne hevt meyr as 100 miljoon albums verkochted, as y syn solowark en allens van Black Sabbath medreakent. Hee wör upenöämen in de Rock and Roll Hall of Fame as lid van Black Sabbath in 2006 en as soloartist in 2024. Ouk in de UK Music Hall of Fame steyt he twey mål in, as soloartist en med Black Sabbath. In de Vereynigde Ståten hevt he seyd den 12. april 2002 in Hollywood ne steare up de Walk of Fame en in Birmingham steyt he up de Walk of Stars seyd den 6. july 2007. By de MTV Europe Music Awards van 2014 kreag he de Global Icon Award. In 2015 kreag he de Ivor Novello Award vöär syn leavenswark, van de britske akademy vöär leedskryvers, komponisten en skryvers.
Osbourne syne vrouwe en manager Sharon stichteden et heavymetalfestival Ozzfest, wat jårliks ehölden wör tüsken 1996 en 2010. Vöärin de jåren '00 wör he ne reality-televisysteare do as MTV em en syn gesin volgden under de titel The Osbournes (2002-2005). Med en paar gesinsleaden was he to seen in de televisyryge Ozzy & Jack's World Detour (2016-2018) en in The Osbournes Want to Believe (2020-2021).