Overleg gebruker:Woolters/Kladblok

Hieroonder t stukn wa'k op n Tweantsen Oawnd hebbe vuur edreagn.

n Tweantsen Boarg

Moi leu, de grote liene mag dan wal “Verdan Nöaln” wean, ik wol toch eawn serieus wordn, vuur zo wied a’k det kan. Ik zin dan wal n jungstn biedreager, en bie wat leu bekeand as nen dolbotter, mear juust doarumme keump t dan miskien good oawer as ik dan es serieus worde.

Ik wol es met oeleu goan dagdreumn. Det doo’k nog wal es, met n greun pöalken dr bie, heanig allenig, betn wies vuur oew oet kiekn, en dan dee gedachtnbeestjes alle kaant op loatn kroepn. Vies hè? Toch komt dee op plaatsn woer a’j zelf vake nit bie köant. Ik wil oeleu metnemn in nen conceit. Det is nen Engelsen naamn vuur oetgebreaide beeldsproake. A’j t nit köant volgen mu’j mear roopn.

As vie t oawer oonze sproake hebt, neume vie det vake Plat. Plat is n aander woard vuur vlak, zoonder heugte. Doar wörd oawerhen ekekn. Op dale ekekn. Ik dreume (dreum iej eawn met?) dan wal es det dr zovölle Plat keump, det det Plat nen bult wörd. Zonnen hoogn bult, de’j dr nit mear umhen kiekn köant; nen Boarg. nen Tweantsen Boarg! Eenn um reknge met te hooldn.

Van wied vort kö’j den boarg al zeen en a’j dr boawn op stoat, kiek iej oawer de hele wearld. De hele wearld an n voot van den Tweantsen boarg! Van oawer de hele wearld heur’j volk: “kearl en gin eande, wat is det dan?” Det hadn ze nog nooit ezeen, en te hope komt ze op den boarg of. Det mut nöader bekekn wordn!

t Is in t begin nen boarg den at völle zorg neudig hef. Net as de kleainn. Hee mut estutt wordn, en bebouwd. Doar he’w iederene bie neudig: kearls en vrouwleu, oold, mear vuural ook joonk, want dee goat in t algemeen länger met! Dr wörd eerst völle in binn- en boetnlaand oawer den boarg esteggeld en evöchtn van: “Kö’w det doar zomear loatn gewordn, of mu’w ingriepn?” Mear as iederene zik stoark maakt en strabaant blif stutn, gröait zik den boarg vaste op de earde, tötdet’e in t lestn nit mear weg is te deankn.

Wat! De umwonnden köant zik in t lestn ginne wearld vuursteln zoonder! Met alns wat doar op den boarg gröain wil, kan zik de wearld redn! Mear t is ja ook ene van de meuiste boargn van de wearld. Leu van oawer de hele wearld komt vuur de wille den Tweantsen boarg bezeukn.

Mooie gedachtn hè? Loa’w es as echte Tukkers eawn met beaide bene op de groond bliewn, want Conceit lik wal heel stoark op Conceited, en det beteeknt Met de neuze in de locht. Op t momeant van sprekn is den Tweantsen Boarg feaitelik ne Tweantse Koele. Det beteeknt det t nit lange mear doert vuur at den vol löp met nen stroom van Hollaands, of Engels, en t Tweants doarin verzop.

Loa’w dan met n aln zorgn de’w de veute droge hooldt duur dee koele op te heugn!

Woolters 11:00, 3 okt 2009 (CEST)

Ie verrast altied weer. En hoe reageerden ze d'rop? Was d'r wieder nog (spraok)bevleugen volk? Ni'jluuseger 12:11, 3 okt 2009 (CEST)

Hail mooi zègd, n baarg en n koel broeken om de situwoatsie oet tou lèggen. Ik bin ook wel benijd hou man hierop reageerd het. Grönneger 1 12:22, 3 okt 2009 (CEST)

Ik wazze trouwens nit n jungsten biejdreager, mear det wus ik nog nit toew a'k det skreef. Ze veundn t allemoal n mooi verhaal, en ze veundn t good op ebouwd. En iederene begreep t ook volledig. Der kwammen noatieds n poar oolde besjes op mie an: "wat he'j det mooi edoan, jongn. Duurgoan!" Weast doar mear nit bange vuur, det doo'k wal. Verskeaidene kearls zeaden t in dubbelzinnig Tweants: "Wat kön iej preaken" en "wat akelig nöalen kön iej". Dus t völ in de smaak.

Woolters 23:09, 3 okt 2009 (CEST)