Mund

Nen geywenden leywe strekket synen bek wyd lös

Den mund of bek is en gat in et lyf wåras deers med eatet en gelüüd med maket. Et gat medeyne achter de oapening heat de mundholde. Et is ouk et eyrste deyl van et magendarmstelsel. Dårachter sittet et slukdarmhöyvd en de strotte. By veerbeynige warvelden wördt den mund umslöäten döär lippen en wangen. Der binnenin ligt de tunge. Behalve vöägel en wat amfibien hebbet ewarvelden der meysttyds ouk tanden by, üm eaten to vermålen. Wat soorten visk hebbet tanden in et strottenhöyvd.

Sougdeers hebbet vake en hard en sacht geheamelde boavenin de mundholde en ne tunge underin. De sydkanten sint de wangen, speykselkleren en under- en boaventanden. De boaventanden ligget in den boavenkaak, de undertanden in den underkaak. By mekander heatet dee de kiwwe. De lippen sint sachte en förmet den mundingank. Döär de strotte kümt de mundholde uut in den slukdarm.

De meyste soorten deers hebbet en ingewandenkanaal med düdelik begin en ende: nen mund an de eyne kante en nen aers an de andere kante. By minder döäruntwikkelde leavensförme, sou as de seyanemone, is den mund ouk den aers.

Andere gebruken vöär den mund

Heyl wat deers, wårunder mensken, gebruket den mund üm gelüüd med to maken en nen ander wat an et verstand to krygen. Gelüüd maken kan up verskillende wysen. Mensken låtet lucht uut de lungen langs de stembanden in den hals ströymen. Döär den lucht langs verskillende standen van de tunge en lippen of döär den nöäse to låten beweagen untståt verskillende gelüden. Kikvörsken gebruket luchtsäkke an de sydkante van den kop üm nen luchtströym up to wekken.

Wat deers gebruket den mund üm lyvswårmde kwyt to raken. Andere deers proberet der indruk med to maken of af to skrikken döär de tandene to låten seen.

Den mund in de språke

Et woord mund wördt ouk gebruked üm nå et uutende van rivyren en andere waterströymen to verwysen. Wyders gevt et verskeidene segswysen oaver den mund:

• Med den mund vul tanden stån = Neet weaten wat to seggen up ne verrassende situaty
• Eyne angapen med nöäse en bek = Totaal verrast weasen oaver yts wat ymand esegd hevt
• Vöäle an et mundwark hebben = En rap weaderwoord klårhebben en snel künnen pråten
• Et vlög em uut den mund as ne ko uut et gat = Eyne kan rap küeren en ouk neet al to netjes
• Den mund geyt em as en pöäpelenblad = Eyne den rap en sunder upholden küert
• En mund-/mündkevul = En klein beaten drinken
• Hee pröt med den mund wåras he med eat = Hee küert synen baas nå