Laos

ສາທາລະນະລັດ ປະຊາທິປະໄຕ ປະຊາຊົນລາວ (Lao) Sathalanalat Paxathipatai Paxaxon Lao
Vlagge van Laos	Wåpen van Laos Wåpen van Laos
Ligging van Laos
Basisgegeavens
Officiele språke	*Lao Chmu Hmong Pu Tai Tai Vietnameesk Engelsk Fransk
Höyvdstad	Vientiane
Regeringsform	Socialistiske eynpartyenrepublik
Godsdeenst	66,0% Buddisme 30,7% Taisk volksgelöyv 1,5% Kristendom 1,8% anders / ateisme
Geografy en bevolking
Uppervlakde - Water	236.800 km² 2%
Inwoanertal - Dichtheid	7.953.556 (2024) 26,7 inw./km²
Koordinaten	17° 58′ N, 102° 36′ O
Oaverige
Volksleed	ເພງຊາດລາວ Pheng Xat Lao ('Hymne van et Lao-volk')
Münteynheid	Kip (₭) ((LAK))
Tydzone	UTC+7
Web | Kode | Tel.	..la | LA | +856

Laos, up papyr de Demokratiske Volksrepublik Lao (DVR Lao) is et eanigste land in Süüdoustasie wat neet an sey ligt. Et is in et noordwesten nåbers med Myanmar en China, med Vietnam up et ousten, Kambodja up et süüdousten en Tailand up et westen en süüdwesten. Der woanet ungeväär 8 miljoon lüde. Höyvdstad Vientiane woanet de meyste lüde. Et landskap steyt bekend üm de bargen, franske koloniale gebouwen en de buddistiske tempelsteades sou as Luang Prabang, wat up de wearldarvgoodlyste van UNESCO steyt.

Et land kan weaderümme grypen up ne kultuurhistoriske identiteit: Lan Xang, en köäningryk wat bestünd tüsken de 13. en 18. eywe. Et köäningryk leade günstig vöär handel oaver land. In 1707 spleat Lan Xang up in dree köäningryken: Luang Prabang, Vientiane en Champasak. In 1893 kümmen se weader tohoupe as fransken beskarmståt, as deyl van fransk indochina. Laos völ under japaneeske besetting in den Tweyden Wearldoorlog töt 1945. Vanaf 1949 völ et weader under Frankryk. In 1953 wör et völleydig selvstandig as Köäningryk Laos, med ne grundwettelike monarchy under Sisavang Vong. Tüsken 1959 en 1975 was der nen börgeroorlog, wårby et kommunistiske Pathet Lao med stüt van Noordvietnam en de Sovjetuny et upnüm teagen de köäninglike strydkrachten van Lao, dee hülpe kreagen van de Vereanigde Ståten. Et uprichten van de Demokratiske Volksrepublik Lao in 1975 bedüüdden en ende an den oorlog. Et was nen socialistisken eynpartyenståt bevreanded med de Sovjetuny, töt den ümmevöl in 1991.

Laos is eyne van de vyv noch bestånde kommunistiske eynpartyenståten dee as et Marx-Leninisme anhanget. De Revolutionäre Volkspartye van Laos hevt de macht. Vöäle neet-oaverheidsinstantys meynet, et land vertreadet menskenrechten. Lüde wordet nå verlüüd emarteld, hebbet weinig vryheid en minderheiden wordet underdrükked. Freedom House nöömt et land autoritäär. Undanks at et land et neet best hevt, sint der untwikkelingen nå en marktericht stelsel, wat nye kansen vöär et land bedüdet.

Laos wil vöäral med verbeateringen an et weagennet de bände med ümliggende landen anhalen. In 2021 was de Laos-China-spoarlyne torechte, den löpt van Vientiane nå Kunming. Dårmed wördt et land makkeliker to bereiken vöär handel en turisme. Et land düt med an et ekonomiske samenwarkingsverbund Gröttere Mekongstreake, wat verbindingen en energyprojekten vöärtrekket. De Wearldbanke wist Laos an as eyne van de rapst groiende ekonomien van Süüdoustasie un de Stille Süüdsey, med jårliks 7,4% der by. Turisme kümt up, energyuutvoor smit noch wal wat up en van buten af wördt in et land geld estöäken. Et land steyt by de Vereanigde Natys to book as minst untwikkeld. Laos is lid van ASEAN, et Asie-Pacifiske Handelsverdrag, den Oustasiatisken Top, La Francophonie en de Wearldhandelsorganisaty.