Harsens

De harsens förmet et anstürende orgaan (brein of bregen) van et seanuwstelsel. Med den rüggengråt förmet se et centrale seanuwstelsel. De harsens beståt uut de groute harsens (cerebrum), den harsenstam en de kleine harsens (cerebellum). De harsens stüret et meyste van et lyf an. Et verwarket, verdeylt en oaversüt de informaty wat et krigt van de seanuwen.

Harsenhälvden

De groute harsens, dee et grötste deyl van de harsens förmet, beståt uut twey deylen, de harsenhälvden. Beide beståt se van binnen uut nen witten öpper en de butenste låge, den grysen öpper (cerebrale cortex). Den grysen öpper besteyt ouk weader uut ne binnenste (allocortex) en butenste låge (neocortex). De butenste låge besteyt uut ses lågen neuronen, de allocortex hevt der dree of vere. Beide harsenhälvden sint verdeyld in veer knubbens, de vöärste, parietale, temporale en oksipitale harsenknubben.

Harsenknubbens

Den vöärsten harsenknubben geyt oaver beslisfunktys as selvbeheyrsing, vöäruutdenken, afweygen en abstrakt denken. Den oksipitalen knubben beheyrt et sicht. Binnen de knubbens sint wat gebeden an te wysen dee specifike taken hebbet, sou as et beheyren van sintügen, beweaging en associaty. Beide harsenhälvden sint min of meyr lyk in förm en taakanstüring, mär wat taken höyret meyr by de eyne as de andere hälvde: språke sit meyr links, rüümdeskatten meyr rechts. Beide hälvden sint verbünden med seanüwbanen, wårvan den korpus kallosum den grötsten is.

Harsenstam

Den harsenstam verbindet de groute harsens med den rüggengråt. Den harsenstam besteyt uut et middenbrein, de pons of varolbrügge en et verlängde marg (medulla oblongata). De kleine harsens sint verbünden med den harstenstam med dree seanüwbanen dee de 'cerebellare pedunkels' enöömd wordet. In de groute harsens sit et ventrikelstelsel van veer verbündene ventrikels wårin harsenvocht emaked en rundepumped wördt. Dårunder ligget verskillende stelsels, sou as de talamus, de epitalamus, de pynappelklyre, de hypotalamus, et harsenanhangsel en de subtalamus; et sougdeerbrein med de amandelkerne (amygdalae) en de seypaerdjes (hippocampi), et claustrum (kloustergang), de verskillende basale ganglia, de basale vöärharsenstrukturen en dree cirkumventrikuläre organen. Harsenstrukturen kummet vake in tweytallen vöär, sou as de beide seypaerdjes en twey amandelkerne.

Harsencellen

Under de harsencellen vallet de neuronen en understüttende gliale cellen. De harsens hebbet meyr as 86 miljard neuronen, nöäst noch ungeväär etselvde antal andere cellen. Harsens warket döär verbindingen tüsken neuronen en öär afgeaven van neurotransmitters as respons up seanüwprikken. Neuronen förmet samen neurale pädte, kringe en ingewikkelde netwarken. Dat wördt anestüürd döär oaverdracht van neuronen.

Beskadiging en seekde

De harsens wordet beskarmed döär de harsenpanne. Se dryvet in harsenvocht en ligget afeskeiden van de bloodbane döär de blood-breingrense. Toch kan et brein skade uploupen, seekdes krygen en infekteerd raken. Dat kan döär stouten of en vordvloien van blood. Dat lätste wördt ne beröörde nöömd. Ouk künnet de harsens afbraakseekdes krygen, sou as parkinson, verskillende förme van dementy sou as Alzheimer, en meyrvoldig sklerose. Geystesandoningen sou as skizofreny en kliniske neaderslachtigheid wordet ouk eseen as harsenafwykingen. Ouk künnet der goodårdige of slechtårdige tumoren groien, al stammet dee vaker uut andere deylen in et lyf.

Harsenundersöök

Et undersöken van wo as harsens in mekander steaket nömet se neuroanatomy. Undersöök nå wat se doot is neuroweatenskap. Der wordet verskillende metodes vöär gebruked. Munsters van andere deers wordet vake under den mikroskoop bekeaken. Dat hevt al heyl wat informaty upeleyverd. Med hüdige geneyskündige techniken as funktionäle neuroverbealding en elektroencefalografy (EEG) is vöäle oaver et menskelik brein to seggen. Ouk döär andoningen van harsenpatienten to undersöken is in et verleaden al nen houp upestöäken. Rechtevoord is de neuroweatenskap behöyrlik an et uutbreiden an, mär vöäle blivt noch undüdelik.

Kulturäle utingen

Harsens en et undersöök der når spreaket töt verbealding. Vöär hunderden jåren sint filosofen al gangs üm ne verklåring vöär bewüstheid to vinden en et probleem van lyf en geyst. In de 19. eywe hölden sik nen houp lüde gangs med frenology: se probeerden persöönlikheidskenmarken in de harsens to vinden.

In science fiction wordet vermeynde gevolgen van harsenverwesselingen noch wal es anedikked. En vöärbeald dårvan is Donovan's Brain uut 1942. Ook in et verhaal van Frankenstein krigt syne kreaty en stel harsens ineplanted.