Graffest

Uut Wikipedia, de vrye encyklopedy
(döärstüürd vanaf "Grafhorst")

Graffest (uutspraoke: Graffes; Nederlands: Grafhorst) is n stad in de gemeente Kampen, in de Nederlandse provinsie Overiessel. Graffest kreeg in 1333 stadsrechten, maar wördt vanwege de grootte meestentieds n dörp enuumd. Hoewel de geskiedenisse van de gemeenskap terugge giet töt 1333, verrinneweerde n brand in 1849 zwat de ele stad. Maar drie van de zestig gebouwen stonnen döörnao nog overeind. In 2007 ad t ongeveer 1000 inwoners.

Graffest ligt tussen t Ganzediep, n water dät n verbinding vörmt met de rivier de Iessel en t Zwärte Meer, en de Kamperzeediek.

Töt 1 jannewari 1937 was Graffest n zelfstandige gemeente. Vervolgens maakte t deel uut van de gemeente Iesselmuden. Toen de gemeente Iesselmuden op 1 jannewari 2001 bi'j de gemeente Kampen edaon wier, ging ook Graffest deel uutmaken van Kampen.

Graffest ef de volgende straotnamen: Graffesterweg (eufdweg), Jan van Dieststraote (gaf in 1333 stadsrechten an Graffest), Meenteweg, Dirkje Kärke Maot (is ebouwd op grond die in t verleden eigendom was van Dirkje Kerke), Zalm-of, Achterstraote, Kärkstraote, Veurstraote, Branderdiek, en de Kamperzeediek. Der is één basisskole en der bin drie kärken: één van de Old Griffemeerde Gemeenten in Nederland, één van de Vri'j Ervörmde Gemeente en één van de Ervörmde Gemeente (PKN). Graffest is n kärkelike plaatse. Bi'j de Tweede Kamerverkiezingen van 2012 be-aalde de SGP net gien meerdereid van de stemmen in t dörp, 45,4%.

In t Ganzediep drekt naost Graffest is in de Tweede Wereldoorlog n bommenwärper neereskeuten (deur n landwacht vanuut polder Mastenbroek). Eén persoon ef dit overleefd, de andere 6 vliegeniers bin ummekomen en liggen begraven op de begraafplaatse van Graffest. Värder is Graffest in t verleden n paar keer elemaole of-ebrand.

An t einde van de 19e eeuw was de veurnaamste inkomstenbron de visseri'je en riet kappen veur gebruuk bi'j rietdekken. Vanwege de grootte van de gemeenskap mutten inwoners now, begin 21e eeuw, un inkomsten meestentieds ärns anders vinnen.

Biestemärkt[bewark | bronkode bewarken]

Tradisioneel wördt in Graffest sinds 1333 in oktober de biestemärkt e-olden, dät n echt dörpsfeest is. De biesten e'j der inmiddels al jören niet meer, maar t tradisionele feest wördt nog altied evierd en Graffesters en old-Graffesters komen dan bi'j mekare um aol en krentemikke te eten, al dan niet onder t genot van n dränkien.

Zicht op Graffest vanuut t zuudwesten ezien


Dit artikel is eskreaven in et sallandske dialekt van Kampen, in de Algemene Nedersaksiese Schriefwieze.