Gilgamesj

Möägelike vöärstelling van Gilgamesj as Meister van de Deers. Med den linkeren arm hevt ne leywe vaste, med den anderen ne slange. Assyriske paleisversyring (713–706 vK), uut Dur-Sharrukin, nu in et Louvre

Gilgamesj (akkadisk: 𒀭𒄑𒂆𒈦, romaniseerd: Gilgameš; oorsprungelik sumerisk: 𒀭𒄑𒉋𒂵𒎌, romaniseerd: Bilgames) was nen held uut de mesopotamiske mytology. Hee is et höyvdkarakter uut et Heldenverhaal van Gilgamesj, en episk gedicht in et akkadisk uut et 2. millennium vöär Kristus. Et mag weasen dat hee nen echt-bestånden köäning was in den sumerisken stadsståt Uruk en later verafgoded. As he bestån hevt, müt dat argens tüsken 2900 töt 2350 vK eweasd weasen. Nen legende wör he pas in de sumeriske tyd, in de Darde Lyne van Ur (2112 - 2004 vK).

Vyv gedichten

Der sint vyv sumeriske gedichten dee as oaver de groute dåden van Gilgamesj vertellet. Den öldsten kan good wean 'Gilgamesj, Enkidu en de underwearld', wårin as Gilgamesj de godinne Inanna kümt helpen üm skepsels uut öären huluppu-boum te verjagen. Hee krigt der as dank twey unbekende tüge vöär, nen mikku en nen pikku, mär dee raket he kwyt. Nå at Enkidu uut de tyd kümt, vertelt den synen skaden an Gilgamesj wo en slim spül et is in de underwearld.

Et gedicht Gilgamesj en Aga beskrivt wo as Gilgamesj in upstand kümt teagen synen baas Aga van Kisj. Andere sumeriske dichtsels beskryvet wo as Gilgamesj den röäse Huwawa en de Heamelske Bulle der under krigt. En vyvde gedicht, wat neet al te best bewård is, geyt oaver synen doud en grove.

Heldendicht van Gilgamesj

In latere babyloniske tyden wörden disse verhalen an mekander eküerd. Et standaard-akkadiske Epos van Gilgamesj wör upeteykend döär den skryver Sîn-lēqi-unninni. Et kan weasen at dat in de middelbabyloniske tyd was (ung. 1600 töt 1155 vK). Hee had et dan weader oaverenöämen van noch ölder brunmateriaal. In et heldenverhaal is Gilgamesj nen halvgod med boavenmenskelike krachten. Hee wördt kameröäde med den wildeman Enkidu. Med mekander beleavet se meanig avontüür. Se trekket der vake med mekander up uut. Up eyne reise verslåt se Humbaba (sumerisk: Huwawa) en de Heamelske Bulle. Dee warren up öär afestüürd döär Isjtar (sumerisk: Inanna), ümdat Gilgamesj neet öären consort wol weasen. Nå at Enkidu uut de tyd kümt döär ne seekde as straf van de goden, krigt et Gilgamesj slim benauwd oaver syne eygene starvelikheid. Hee geet by de wyse Utnapisjtim an, oaverleaver van den Grouten Vlood, üm hoapelik unstarvelik to worden. Dan kan, segt den em, mär dan müt y wal wat horden oaverwinnen. Dat krigt Gilgamesj voordan mär neet vöär mekander. Hee krigt in de gate at unstarvelikheid neet te doon is en geyt dan mär weaderümme up huus an, nå Uruk.

Invlood up andere warken

De meyste geleyrden bejåt et dat et Epos van Gilgamesj grouten invlood had hevt up de Iliad en de Odyssey, twey episke gedichten in oldgreeksk in de 8. eywe vK. Et verhaal van de geboarde van Gilgamesj steyt beskreaven in ne anekdote in Oaver den oorsprung van deers van den greeksken skryver Aeliaan. (2. eywe nK). Volgens Aeliaan hölde Gilgamesj syn groutvader syn moder under den duum üm de kearls by öär vord to holden. En orakel had em ja verteld at synen kleinsöäne em solde verdryven. Undanks de strakke afskarming wör see toch swanger. De wachters smeyten et kind van nen torend, mär nen adelaar pikkeden em uut de lucht en landden der med in nen boumgaard, wåras den gardenkearl em wyder upbracht.

Gilgamesj nu

Et Heldendicht van Gilgamesj wör weader untdekked in de biblioteek van Asjurbanipal in 1849. Do as et was oaversetted, was der vöäle üm te doon ümdat et up wat stükke toch wal slim stark up den hebreywsken Bybel leak. De heyle 20. eywe wör der weinig andacht an Gilgamesj besteaded, mär begin 21. eywe wördt et en voordan belangryker figuur in de moderne kultuur.