Gebruker:Servien/Twænts

Uut Wikipedia, de vrye encyklopedy
Naar navigatie springen Naar zoeken springen
Disambig-dark.svg Vüür ne deepgåånde taalköndige beskrywing van de Twæntse språke, mü'j in een Twæntsen taalwyser kyken >>.
Twæntsen taalwyser
Servien/Twænts
Twænts taalgebeed en sinne indeling
Twænts taalgebeed en sinne indeling
Spraoke Twænts
Andere namen Plat, Tükkers (vake grappig bedoold)
Laand Nederlaand
Taalgebeed et Oosten van de proveensy Åveryssel, de regio Twænte
Antal sprekkers 338.000
Dialekte Düür Jo Daan in-edeeld as:

Wyder nog weer oonder te verdelen in döörpsdialekte

Taalklassifikatie Indo-Üropees
Skrift et Latynse alfabet
Staotus et Twænts wörd seen as dialekt van et Nedersaksys
Taalkode ISO 639-1 n.v.t.
Taalkode ISO 639-2 nds
Taalkode ISO 639-3/DIS twd

Twænts is een variaant van et Nedersaksys wat köyerd wördt in et oosten van de proveensy Åveryssel, de regio Twænte. Et wörd vaak seen as et meest Sassyse dialekt van Nederlaand, ümdat et nog de meeste Westfaalse kenmarken hev. Der besteet gin Standaardtwænts; alle döörpe en stæden hebt öör egene slag van köyeren, mer bint oonder mekaar wal te verståån, en deelt ne grammatika, uutdrükkings en de meeste wöörde.

Jüüst döör disse verskeydenheyd wörd den naam Twænts nich aait bruukt. De meeste lö nöömt et by de lokale variaant, bv. Oldensels, Ænters of Hoksebarges. Völ lö dænkt by et woord Twænts an et Oost-Twænts. De ræden hyrvöör is dat de lö mænt dat se in Oost-Twænte püürder Plat köyert as in West-Twænte. Mer dit is vake baseerd op volksannames.

Språåkgebeed[bewark | bronkode bewarken]

Twænts wördt sprökken in alle Twæntse gemeentes. Dat wil seggen de gemeentes Ryssen-Hoolten, Heldern en Twænteraand en alles op et oosten dåårvan binnen de proveensy Åveryssel. Allennig in et westen van de dree gemeentes dee hyrvüür nöömd wörden, wörd Sallaands sprökken. In Heldern en Nijverdal besteet een åvergangsdialekt met meesttyds Twæntse wöörde dee as op syn Sallaands verbüügt wordt, so as bv. de verkleynuutgang -yn (boom-böömpyn tegenåver boom-böömken).

Dåårnøøst wörd der in de gemeente Twænteraand ook Sallaands sprökken, mer ümdet völle lö dåår grööts bint dat se uut Twænte komt, nöömt se et selv Twænts.

Et is wydters neet düdelik wåår of et Twæntse språåkgebeed ophoold en een aander dialektgebeed anvaank. Der is ginnen düdeliken skæid tüsken Twænts en et Grååfskopper plat of et West-Möönsterlaands in Düütslaand.

Indeling[bewark | bronkode bewarken]

Twænts is een dialekt van et Westfaals Nedersaksys, wat höört by de West-Germaanse språken, dee as deel bint van de Indo-Europese språåkfamily. Twænts wörd, nåår vüürbeeld van dialektoondersöker Jo Daan, vake opdeeld in Oost-Twænts en Twænts-Grååfschops (West-Twænts). De språke is in grote lynen wal etselvde, mer oonderling is der tüsken de verskæidene döörpe en stæden völ verskil in uutspråke en uutdrükkings. Der is neet een en et sölvde dialekt, en ook gin Algemeen Twænts.

Dit blik vüüral uut et West-Twænts en et Vjens. Dit hev vüüral met de uutsprååk van bepåålde wöörde te doon. Et Westfaals steet bekænd üm de klaankbrökke. Dit köömp ook in wat soorten West-Twænts vüür, en nog et düdelikst in et Vjens, bv. in wöörde as bjätter vüür "beter" en waver vüür "åver".

Et Twænts-Grååfschops slot an by et noordelike en oostelike Achterhooks en süüdoost-Sallaands, terwyl as et oostelike Twænts völle åvereenkomsten hev met et dialekt van de südelike grååfschop Bæntem.

Kenmærken[bewark | bronkode bewarken]

Et West-Twænts hev lösse, vrye lettergrepe (bv. geevn, tegel), wåår Oost-Twænts rechtevoort geslöttene, korte klaanken hev (gevven, teggel). Een aander vüürbeeld is et woord vogel, wat in Oost-Twænts wörd uutsprökken as voggel /(['vɒɣəl], en in West-Twænts as /[vɔːɣəl]. De West-Twæntse variaanten Ryssens en Ænters, en et Vjens heb dåår wåårskynlik de oolde Westfaalse klaankbrökken behøølden, dee as vroger düür heel Twænte vüürkwammen: et Ryssens sprekt "vogel" uut as /vɔəɣəl/, en et Vjens en et Ænters sprekt et uut as /vuəɣəl/.

Ook an wærkwoordsvervogings kan et slim uut mekaar lopen. Vüür et Hollaandse "ik ben, jij bent" wordt verskillende Twæntse ümmesettings bruukt en et ligt der mer net an wo as ene selv gærne köyert:

  • Ik bin, y bint/beent (du bist)
  • Ik bün, y bünt/böönt
  • Ik sin, y sint/seent
  • ik sün, y sünt/söönt

Ook is de grammatika lük aanders tüsken Oost-Twænts en Twænts-Grååfskops: in et Oost-Twænts is et voltooid deelwoord aait soonder vüürplaksel: (bv. "Wy bint gåån" en "Wy hebt wünnen"). In et Twænts-Grååfskops is det neet so eendüdig: as et vüürgåånde woord ændigt in nen kleenker, dan hev et Twænts-Grååfskops ook gin vüürplaksel. Ændigt et vüürgåånde woord in nen metkleenker, dan köömp der ne sjwa tüsken ([ə]). (bv. "Ik hebbe in de böke kekken en "Ik hebbe in een hook ekekken).

Een antal belangryke isoglossen (taalverskillynen) loopt tüsken et oostelike Twænts en et Twænts-Grååfschops, namelik de neet-nich-lyne en de vüür-vöör-lyne. In et westen van dee lyne seggent se 'neet' en 'vüür' en in et oosten 'nich' en 'vöör' (In et Oost-Twænts is "ne vöördööre machtig düür" en in et Twænts-Grååfskops is "ne vüürdüre machtig döör"). Wydter löp et gebruuk van bepåålde wöörde wat uuteen. In Oost-Twænts hebt se et åver ne vroot, terwyl at det in et West-Twænts ne wöle het.

Oonder disse indeling gev et ok nog verskæidene döörpsdialekte dee as allemåål nog weer van mekaar verskilt. De dialekte van Dænekaamp, Oldensel en omstreken hebt byvüürbeeld et ööldere 'du' vüür den tweeden persoon ænkelvoold behoolden, wåår as de aandere dialekten et höffelike 'y' as informelen ansprekvörm seent gåån bruken. Et Ryssens en Ænters hebt Westfaalse klaankbrökken, dee as wåårskynlik vroger ok in de rest van Twænte vüürkwammen, mer et meest ofwykend is et Vresenvens (Vjens). Det hev namelik völle Sallaandserye, mer ok bysööndere tweeklaanken, wåårvan as et neet düdelik is of dee düür et Freesk of et Westfaals veroorsaakt beent. Döör dat leste wörd Vjens vake as taaleylaand seen.

Nøøst de plaatselike verskillen gev et ok nog oonderskæid tüsken de verskæidene gelöven. Vööral in de wat tradytsionelere enklaves prååt roomse en protestaantse lö aans as mekaar. Disse verskillen verdwynt tegnwoordig steeds meer.

Grammatika[bewark | bronkode bewarken]

Twænts is, net as alle Germaanse språken, ne SVO-språke. In de hööfdsinnen köömp aait eerst et oonderwærp (S), dan een wærkwoord (V) en dåårnå et lydend vöörwærp (O). In de bysinnen is Twænts rechtevoort ne SOV-språke, wat inhoold det eerst et oonderwærp (S), dåårnå et lydend vöörwærp (O) en dan et wærkwoord (V) esegd wörd:

  • hööfdsin: (S)Jan (V)skrif (O)böke.
  • bysin: hee sæ, det (S)Jan (O)böke (V)skrif.

t Is annemmelik det dit oonder invlood van et Nederlaands so ekömmen is, want et köömp -vööral oonder ooldere lö- nog wal es vöör dat ook in bysinnen ne SVO-volgorde an-ehoolden wörd:

  • hööfdsin: Hee har met vekaansy ewest nåår Italië.
  • bysin: Hee sæ det* hee har met vekaansy ewest nåår Italië.

Skryfwyse[bewark | bronkode bewarken]

Twænts hev ginne vaste verplichte skryfwyse. De lö wörd an-eråden te kysen uut twee gangbere skryfwyses: dee van de Kreenk vuur de Twentse Sproak vake ofkortt töt KVTS en de Standaard Schriefwieze. De Standaard Schriefwieze is baseerd op de uutspråke van et Twænts, soonder tevölle onnödige læstekens. De KVTS-skryfwyse is baseerd op et Neerlaands met andacht vüür skryfwyses van ümliggende dialekten, en skrif dåårümme so voluut mögelik, düür bv. in waarkwöörde de leste -en voluut te skrywen. Hyroonder steet een vüürbeeldtekst in de bæide skryfwyses, üm et verskil düdelik te maken:

KVTS-skryfwyse

De meeste leu meant dat hee 'n betten vrömd is. Hee löt zik nit vake zeen, en der keump ook hoaste gin volk bie um achterhen kieken. Meestentieds zit he 'n betten nosterig van achter 't gordien noar boeten te kieken. De leu warren al lange stopt de haande noar um op te stekken.

Standaard Schriefwieze

De meeste leu meant at hee n betn vrömd is. Hee löt zik nit vake zeen, en dr keump ook hoaste gin volk bie um achterhen kiekn. Meestntieds zit he n betn nosterig van achter t gordien noar boetn te kiekn. De leu warn al lange stopt de haande noar um op te stekn.

Gebruuk en behoold[bewark | bronkode bewarken]

Et vrogere Van Deinse Instituut (rechtevoort TwentseWelle) høøld sik gangs met et now en et verledden van Twænte. Dit institüüt in Ænske richt sik op de strekkültüür, de volksköönde, strektaal, kültüürgeschydenis en et laandskop van Twænte. De Kreenk vuur de Twentse Sproak is ne verening vüür et Twænts en hev ne spelling van et Twænts. De schryfwyse van den Kreenk wik lichte of van de Standaard Schriefwieze van Goaitsen van der Vliet. Et Van Deinse Instituut hev ne adviserende rolle vüür de media, wååroonder RTV Oost. Dit televisystatsion kwam in 2005 met ne süksesvolle Twæntse soapryge op televisy, Van Jonge Leu en Oale Groond. Hyran wærkten oonder aandere Herman Finkers en Goaitsen van der Vliet met. Finkers vertaalden twee van syne kabaretvüürstellingen in et Twænts.

Et Twænts wördt teggenwöördig meender sprökken, ümdat de oolders vandaag-an-n-dag meesttyds dervüür kyst üm de keender in et Nederlaands groot te brengen, terwyl de ooldere lö oonderling wal Twænts köyert. In de dree steden Ænske, Hengel en Almelo is de verslatering van et dialekt völle grötter as op et plattelaand. Dit betekent in de wat meender verstædelikte delen van Twænte vöörnamelik dat de jongelö tweetalig opbracht wordt. Dat wörd op verskillende wyses düdelik. De jongere generasys dee't wærk hebt in de laandbouw, bouw en vervoor en sorgsektoren doot in et dageliks læwen völle Twænts, ofwisseld met Neerlaandse sinnen of sinsdelen. Höger oplæidde jüngerden köönt döör mekaar nömmen wal Twænts, mer söölt ærder vöör Hollaands kysen, vake ook in verbaand met wærk wat se doot. By verenigingen en klübs en by et uutgåån is et oonder een groot deel redelik gebrukelik üm Twænts te köyern, mangs völ ofwesseld met Nederlaands.

See ok[bewark | bronkode bewarken]

Uutgåånde verwysingen[bewark | bronkode bewarken]