Diezerstraote

Uut Wikipedia, de vrye encyklopedy
(döärstüürd vanaf "Diezerpromenade")
Diezerstraote in 2007, op een röstig tiedstip
Diezerstraote rond 1933 mit links de jugendstil-pui van 't Witte Kruus

De Diezerstraote (in oldmoeds Zwols: Diesstraote, mit lange ie[1]), ok wal Diezerpromenade enuumd, is de veurnaamste winkelstraote in 't centrum van de Oaveriesselse heufdstad Zwolle. D'r kump veule volk te kuiern, kleraozie en nog aander spul kieken en kopen. D'r bint ok terrassies. De straote is veur auto's esleuten.

Vanof de Grote Mark an d'iene kaante loop ie oaver de Diezerstraote naor de grachte en stadsmure (daoras nog een ende van stiet) en de stee van de in 1829 of-ebreuken Diezerpoorte.

De straote lig op een dekzaandrogge. Bi'j de bouw van 't ni'je diel van de openbaore bibliotheek, die an de Diezerstraote lig, bint speuren evunden uut de Karolingische tied.[2] In 't Rentenboek van het Olde Beghijnenhuis, bi'jehölden van 1368 töt 1572, wördt de 'Deserstrate' en de 'Desermarke' enuumd, wat wis op de oldere uutspraoke mit lange ee.[3]

Rieksmonument De Witte Leeuw, begund as bierbrouweri'je

Historische paanden[bewark | bronkode bewarken]

In de Diezerstraote viej verskeiden paanden van historische weerde. Rieksmonument De Witte Leeuw op nommer 58 wördden ebouwd in 1666 veur bierbrouwer Albert Brouwer. 't Gebouw was roem twei ieuwenlaank een bierbrouweri'je en töt 1873 een likeurstoakeri'je. Det kuj ziene an de gebieldhouwde biervatten an weerskaanten van de dakkapel.[4] In de eerste helfte van de twintigste ieuw was 't paand een kleraozie- en hoedenzake. Det kuj nog weerummevienen in de glas-in-loodramen daoras hoeden in bint of-ebield, en in de name van de eigenaor boaben de entree (A. Hendriksen).[5] Vandage zit d'r in 't gebouw een vestiging van een parfumketten.

Rieksmonument 't Witte Kruus (nommer 93 en 93a) uut de neengtiende ieuw is van historische weerde deur zien liestgèvel en in 't bezunder deur zien onderpui. Dizze wördden in 1904 in jugendstil op-etrökken uut hardstien, rode glazuurde bakstiender en blaank teakholt. Dit gebeurden in opdracht van apotheek Meulenhoff, die as 't paand betrökken.[4] De pui is ontwörpen deur architectenbureau De Herder & Hellendoorn. In de midden van de pui hej een stileerde ofbielding van Asclepius, in de Griekse mythologie de haalfgod van de geneeskunde en genezing.[6] An de uutenden van de pui bint twei vrouwluden an-ebrocht in hardstien. Vandage zit d'r in 't paand een kleraoziezake.

Rifferenties[bewark | bronkode bewarken]

  1. Minke Kraijer, Henk Mulder, Dick Visscher en Philomène Bloemhoff-de Bruijn (red.) (2009), Op zien Zwols: Woordenboek van de Zwolse taal, Kampen: Iesselakkedemie
  2. Jan ten Hove, Geschiedenis van Zwolle, blz. 39, ISBN 9040090505
  3. Evert van den Berg en Philomène Bloemhoff (2021), 'Van de taal van het Rentenboek van het Olde Beghijnenhuis naar het Zwols van nu', in: Henk Bloemhoff en Henk Nijkeuter (red.), Jaorboek Nedersaksisch 2 (2021), Oosterwoolde; Zwaag: Stichting Sasland i.s.m. boekenbestellen.nl, blz. 83-4
  4. 4,0 4,1 Infermaosiebredtien an 't paand
  5. Webstee van 't Historisch Centrum Overijssel
  6. Overbeek, M. (2006). Krullen in Zwolle. Zwols Architectuur Podium
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.