Call of Duty
Call of Duty (letterlik: Plichtroop) is en militäär skeetspel en mediabedryv under Activision en küm vöär et eyrst uut in 2003. De spellen wörden eyrst emaked döär Infinity Ward, dårnå döär Treyarch en Sledgehammer Games. Andere untwikkelaars hebbet weader afleidingen emaked. Den meyst recenten is Call of Duty: Black Ops 7.
Oorsprungelik draiden de spelryge üm den Tweyden Wearldoorlog. Infinity Ward makeden Call of Duty (2003) en Call of Duty 2 (2005). Treyarch makeden Call of Duty 3 (2006). Vanaf Infinity Ward's Call of Duty 4: Modern Warfare (2007) richteden et spel sik meyr up moderne oorlogsvoring. Den nyen titel satten en vöärbeald vöär wat der nå küm en gavven den vöärset vöär de Modern Warfare-subuutgaves. In 2016 wör Modern Warfare in vernyden förm upny uutegeaven. Twey andere versys, Modern Warfare 2 (2009) en Modern Warfare 3 (2011) küm tüskendöär ouk noch uut. In 2019 küm der ne verbeaterde versy van Modern Warfare, Modern Warfare II in 2022 en Modern Warfare III in 2023. Buten disse ryge makeden Infinity Ward noch Ghosts (2013) en Inifinite Warfare (2016).
Treyarch makeden ouk noch en spel med den Tweyden Wearldoorlog as achtergrund. World at War küm uut in 2008. Twey jår later brachteden se Black Ops uut en dåruut untstünd de Black Ops-ryge in ses deylen: Black Ops II (2012), III, 4, Cold War, 6 en 7. De lätste dree was Raven Software ouk by. Sledgehammer Games, dee ouk al by Modern Warfare 3 warren, hebbet selv ouk dree titels up naam: Advanced Warfare (2014), WWII (2017) en Vanguard (2021). See warren ouk höyvduntwikkelder by Modern Warfare III.
In oktober 2023 was Call of Duty meyr as 500 miljoon mål verkochted en spöälden et måndeliks meyr as 100 miljoon lüde online up alle platförme by mekander. Et bedryv had der der sou'n 28 miljard euro an verdeend teagen 2022. Et spel steyt in et Guinness Book of Records as bestverkochte skeetspel. Et is et up twey nå best verkoupende spellenbedryv ooit. Andere dinge wat et bedryv maket sint under meyr aktypuppen untwörpen döär Plan B Toys, en kaartspel van Upper Deck Company, Mega Bloks-sets van Mega Brands en en stripbookryge van WildStorm Productions.