Buursebekke
De Buursebekke is een rivierken wat ontsteet oet 'n Oa biej Oahoes in Duutsland en zo ongevear de zudergrenze van Twente angef. Biej de Haarmühle in Duutsland kort oawer 'n poal, kump he Nederland in en löp dan tusken Buurse en Hoksebarge op Deepn an. Vanof doar löp he as Skipbekke verdan op 'n Iessel an biej Deaventer.
De löppe van de Buursebekke is een paar moal verleg. De olde Bekke was benaamd vuur Hoksebarge vuurnaam. An beide zieden doarvan ligt de öldste aarve van de maarken Buurse, Hoksebarge en Hoënesch. Vanolds leup de Buursebekke dwers deur et dorp, langs de Kloashoesweg en dan op et zuden an langs de Oostenstroate (wat noe de Jhr. von Heijdenstroate is). Oet opgreawingen in 2010 bint doar spoors van vunden in 'n olden hof van de pastorie biej de Hervörmde Kaarke. Der wör bouwd veur een appartementenblok. Oet de bouwputte köm ok nog nen boomstam noar boawen wat as peilstok vuur et water denen.
Op et punt biej de Maarkt met de Möllenstroate was in 1967 ook al in nen bouwput de bedding van de Olde Bekke te zeen. Van doaroet gung et streumke wieder duur et Meuken, benoorden langs de Eibargsestroate, de Ten Vaarwaarkstroate en dan vuurbiej de boerderiejen van et Varck.[1]
Rond 1400 leut Deawenter ne skeepsverbinding greawen tusken de Maarkelsebekke en de Buursebekke. Um de skippers töt an De Broam in Buurse te loaten kommen leuten ze in Hoksebarge do van de Morsbrugge töt de Koekoeksbrugge ne nieje bekke greawen, zo as der den nog lig. Vanof de Kloashoesbrugge greuven ze nieje bedding noar de Vedder kort biej de Möllenveldsbrugge. Zo köm de Buursebekke an de hüdige löppe. Voaren deden de skippers met zompen of zoneumde pötte, skeepkes van 8,5 meter lank biej 1,5 meter breed en nen meter hoge. As ze niks vervoren sneden ze mer 12 centimeter duur et water. Op Hoksenbaargsen grond bint verskeidene oawerslagsteas vunden. Doar kömmen handelsleu vanoet umliggende steas met peard en wage op an en deden dan de waar oawerladen op de boten. In et Assinksbos is nog aait de Poteardenhook bekend, zo neumd noa de potearde veur pöttebakkerieje wat doar wunnen wör. Biej de Lankheterbrugge is völ holtskool wiervunden. Dat wör hier opsloan en duurvoord noar iezersmelteriejen van Deaventer. Biej De Broam in Buurse zammeln ze boomstämme vanoet Duutsland. Dee wörden dan op vlotten oawer de bekke vervoord. 'n Skriewer Sylvanus oet de 17e eeuwe wus te melden at de Skipbekke slim geschikt was "voor de holtkoperen om groote balcken uit Twente en de grenzen van Munsterland met kleine moeyte ende kosten af te brengen".
Noa Napoleon wörden landweagen verhard en verbetterd. Doarduur wör binnenlands skeepverkear minder vuurnaam. Noa 1900 was et kats doan met et spul. Noa 1950 wör de Buursebekke ne geleefde stea um te zwemmen.
- ↑ canonvannederland.nl 'Buurserbeek'. Bekekken op 13 oktober 2025.