Bangkok
Bangkok, officieel op zien Thais Krung Thep Maha Nakhon (vaak ofkort töt Krung Thep), is de heufdstad en drokste stad van Thailaand. De stad beslöt 1.568,7 veerkaante kilometer. In de stad zelf wont zo'n 10 miljoen leu tehoop. Met de veursteaden der biej komt ze an de 17,4 miljoen (25% van wat Thailaand an inwonners hef). Doarmet stek Bangkok wied boawen alle aandere steaden in et laand oet, wat grötte en ofdracht veur de schatkist angeet.
'n Anvang van Bangkok möt zöcht wörden in et tiedpeark Ayutthaya in et 15e joarhoonderd. Do was et een haandelspöstke, wat oeteandelik oetgröaiden töt twee verschillende heufdsteaden: Thonburi in 1767 en Rattanakosin in 1782. Binnen de modernisering van et olde Siam (zo heten Thailaand eerst) in 't 19e joarhoonderd nöm Bangkok ne veurname stea in. Et laand har te lieden van drok oet et Westen. Ok binnen de interne politieke stried van et laand in et 20e joarhoonderd was Bangkok kopleuper. 'n Könning wör ofzet, der köm nen groondwet en der warren verscheine stoatsgrepen en opstaanden. Oonder 't Steadelike Ambt Bangkok van 1972 kreag de stad nen oetzunderden stoatus. Tusken de joaren '60 en '80 van 't 20e joarhoonderd wassen de stad onwies an. Rechtevoort drok Bangkok een fleenk steampel op de politiek, ekonomie, et onderwies, de media en de hele wiedere samenleaving van Thailaand.
Vanof 1980 ongeveer kwammen der heel wat investeerders op Bangkok an en nen helen koppel multinationals verhuusden ere regionale heufdkantoren der hen. De stad kö'j noe in de strek nich umhen as et geet um geldzaken, haandel en popkultuur. Et is ne deurvoerstea veur vervoor en gezoondheidsplege. Ok könt kunsteners, artiesten en modeleu der good geworden. De stad steet der um bekeand at der aait wat te doon en te zeen is. Ook de rosse buurten komt völ leu op of. Et Grote Paleis en boeddhistische teampels as Wat Arun en Wat Pho stekt slim of teggen et nachtleawen van Khaosan Road en Patpong. Bangkok steet hoog in de liesten van grötste toeristenbestemmingen van de wearld.
Et onmeundige bouwen van Bangkok in de gröaitied gung zoonder deep noadeanken oawer stadsplannen. Doardeur stek de stad op wat steas wat krang in mekaar en kan et weagennet et ok amoal nich an. De leu in Bangkok mait ook geern zelf autoveuren, woardeur et dagens slim vastlöp in Bangkok, ondaanks at der best wa wat autobanen bint. In de joaren '90 gavven dat ok stearken smogvervoeling. De stad probeert noe wat met openboar vervoor um der wat an te doon. Et gef noe tien stadsspoorlienen en ze wilt ok wa andere dingen proberen, mer opstoppingen bliewt een slim probleem.