Ariana Grande
Ariana Grande-Butera (26. juni 1993) is nen amerikaansken sanger, leedkesskryver en aktöör. Med en bereik van veer oktaven töt in et flöytbereik is see en invloodryk menske in de popmusik. Tydskrivten as Rolling Stone en Billboard nömet Grande eyne van de gröätste artisten aller tyden. Time nöömden öär as eyne van 100 meyst invloodrykste figuren in 2016 en 2019.
Nå öären anvang as teener in de musikal 13 (2008) van Broadway begünde Grande bekend te worden as Cat Valentine in de televisyryge Victorious (2010-2013) van Nickelodeon. Dåruut köäm in 2013 en 2014 ouk nen spinoff voord: Sam & Cat. See slöät en oavereynkumst med Republic Records en gavven et studioalbum Yours Truly (2013) uut, en retro-achtig pop- en R&B-album wat boavenan in de Billboard 200 binnenköäm. Up öäre volgende twey albums (My Everything uut 2014 en Dangerous Woman in 2016) döäde se der ouk wat elektroniske elementen by döär. Dee wörden internationaal good untvüngen. Van de albums deaden de nummers "Problem", "Break Free", "Bang Bang", "One Last Time", "Into You", en "Side to Side" et good.
Persöönlike problemen löät Grande döärskeameren in de albums Sweetener (2018) en Thank U, Next (2019), dee beide trapmusikelementen hadden. Den lätsten köämen de hits "Thank U, Next" en "7 Rings" up de Billboard Top 100 van. See haalden de meyste nummer eyn-bestörmingen van de VS med et titelleed van öär R&B-achtige album Positions (2020) en de samenwarkingsnummers "Stuck with U" en "Rain on Me". Nå wat tyd buten de musik köäm see weader med en ny album, Eternal Sunshine (2024), wat meyr dansmusik-invloden had. Van dat album köämen de nummers "Yes, And?" en "We Can't Be Friends (Wait for Your Love)" up nummer 1 in de VS.
Med et politik satiriske Don't Look Up (2021) güng see weader an et akteren an. See vertolkeden Glinda in de fantasy musikalfilm Wicked (2024), wårmed see nomineerd wör vöär nen Academy Award. Ouk deade see med in den upvolger der van: Wicked: For Good (2025). Wyders makeden see noch musik; öär neagende album Petal (2026) steyt öäre teende nummer 1-hit "Hate That I Made You Love Me" up.
Grande is eyne van de bestverkoupende musikanten van alle tyden. See hevt nå skatting meyr as 90 miljoon albums verkofd. In 2020 was see de best-verdenende musikante. Prysen wat se wünnen hevt sint under meyr dree Grammy's, nen Brit Award, twey Billboard Music Awards, dree American Music Awards, veertig Guinness World Records en darteen MTV Video Music Awards. Grande hevt ses Billboard 200 albums dee up nummer 1 stünden en teen Billboard Hot 100 nummer-1-singles. Buten de musik en öär akteerwark warkeden see samen med vöäle leevdådigheidsinstellingen. See maket sik hard vöär derenrechten, geystelike gesundheid, en lyke rechten up gender, ras en LGBT-vlak. See verkocht ouk smink under et mark R.E.M. Beauty en en lekkerruuklyne wårmed as see wearldwyd meyr as 1 miljard dollar hevt verdeend. See is den up vyv nå meyst evolgden Instagrammer.