Aleksandrie
Alexandrie is ne stad in Egypte. Med al et verstädelikte gebeed der by üm hen woanet der 6,1 miljoon lüde up ne vlakde van 1,108 km2. Liggend up de westelike over van de Nyldelta strekket et sik 40 kilometer uut langs de noordküste van et land. Et is Egyptes vöärnaamsten seyhaven en up Kairo nå de grötste stad. Ouk is et de grötste stad an de Middellandske Sey. De stad wör stichted in 331 VK döär Aleksander den Grouten. Et is eyne van de vöärnaamste städen uut de oldheid. Rechtevoord is et en centrum vöär weatenskap, kultuur en undersöök.
De stad drägt de bynamen Brüüd van de Middellandske Sey en Pearl van de Middelandske Küste. Et is ne groute turistentrekker en ouk heyl wat industry hevt der wark. Et is de up vyv nå grötste stad van de arabiske wearld en et middenousten en de up teen nå grötste stad van Afrika. Aleksandrie wör stichted by ne olde egyptiske neadersetting med name Rhacotis, wat later et 'Egyptiske Deyl' wör. De stad was höyvdstad van et Ptolemaeiske Köäninkryk en was de belangrykste stad vöär handel, leyring en wysbegeyrde gedurende de greekske oldheid en late oldheid. Der wördt emeynd at et langen tyd de drukst bevolkede stad van de oldheid was.
Aleksandrie was vöäral bekend üm den Vüürtorend van Aleksandrie (Faros), eyne van de Söäven Wearldwunderen. Et andere wår Aleksandrie bekend ümme stünd was de Groute Bookhalle, de grötste van de wearld in den tyd. En darde herkenningspunt was de Katakomben van Kom el Sjokafa, eyne van de Söäven Wearldwunderen in de Middeleywen.
Souwat dusend jår lange was Aleksandrie eyne van de tounangeavende städen van de Middellandske Sey. Dat was sou durende de romeinske en bysantynske tyd töt an de mohameddaanske veröyvering van Egypte in 641 NK. Do wör ne nye stad as höyvdstad eköäsen in Fustat, wat nu deyl van Kairo is. De stad was unmündig vöärnaam vöär et vroge Kristendom. Et Patriarchaat van Aleksandrie sat der, eyne van de dryvende krachten van et gelöyv in den tyd in et Oust-Romeinske Ryk. Vandage den dag meynet beide de Kopten en de Greekske Ortodokse Karke at et öären oorsprung is.
Halvweg et söävende jårhunderd was Aleksandrie al halv löädigeröyvd. Van den vöärgånden glory was weinig oaver. Toch bleav et noch lange en neet unvöärnaam middelpunt vöär handel en as marinebasis. Vanaf de 18. eywe begünde et weader in de beyne to kummen as oaverslagpunt in den internationalen skeypvårt. Et was en handig knouppunt tüsken de Middellandske en Roude Sey en de winstgeavende handel in egyptiske boumwulle. De echte upstanding van Aleksandrie begünde under Muhammad Ali (neet den bokser), den eseen wördt as den grundlegger van et moderne Egypte. Den sat achter vöärname weagenbouwplannen en modernisaty.