Zakynthos

't Uutzichte op Zakynthos mit de haven vanuut 't darpjen Bochali

't Uutzichte op Marathonissi ('t schilpaojeneilaand)

Ouwe oliefbomen bie Potamia

't Eilaand Zakynthos van bovenof

Zakynthos (uutspraak: Zà·kien·ðos, Grieks: Ζάκυνθος), is een Grieks eilaand en departement (nomos), oek bekend onder de (eigenlijk Iteljaanse/Venesiaanse) naam Zante of Zacinto.

Zakynthos beheurt samen mit onder meer Lefkas en Kefalonia (in 't noorden van Zakynthos) tot de Ionische Eilanen. 't Is 't darde eiland in grootte van disse eilanengroep in de Ionische Zee. Zakynthos hef een oppervlakte van 410 km². De lengte van 't eilaand is ongeveer 40 kilemeter en de breedte 20 kilometer. De totale kuslengte is ongeveer 123 kilemeter. 't Hoogste punt van 't eilaand is Vrachionas op 758 meter boven de zeespegel, zo'n bietjen in 't midden van 't eilaand.

't Eilaand Zakynthos lig in 't wessen van 't vastelaand van Griekenlaand, ongeveer op gelieke heugte mit Secilië. De heufstad van 't eilaand is 't gelieknamige Zakynthos/Zante en lig an de zuud-oostkus van 't eilaand.

Geschiedenisse

Zakynthos wönnen vake Il fiore di Levante eneumd (de bloeme van 't osen). 't Eilaand is verneumd naor de jonge van Dardanos, de koning van Troje. In de Romeinse tied maken Zakynthos deel uut van de previnsie Achaia. To Constantien de Grote 't Byzantiense Keizerriek oprichen, beheuren Zakynthos tot de previnse Illyrië. Daornao is 't nog verschillende keren in aandere hanen evuilen van onder aandere de Venesiërs, Fransen, Britten, 't is daornao nog een hortjen onofhankelijk ewes en uuteindelijk wönnen 't op 21 mei 1864 verenig mit Griekenlaand.

De bescharmheilige van 't eiland is Dionyssios, dee der in 1547 geboren wönnen en der in 1622 uut de tied kwam. In 1953 wönnen Zakynthos deur een grote eerdbeving etröffen mit in totaal zo'n 120 schokken, hierdeur was ongeveer 70% van 't eilaand verrieneweerd, waoronder veule Venesiaanse huzen en verschillende Byzantiense karkjes mit kunsverzamelingen. De belangriekste karke van Zakynthos, de "Agios Dionísios", bleef gelokkig staon.

Klimaot

Zakynthos hef een subtropisch-mediterraans klimaot. 's Wienters he-j der aorig wat regen, mer deur de gunstige tempereturen is 't eilaand beheurlijk greun. Der koemen veule oliefbongerds veur. 's Zoemers zit 't vol mit sekaojen, dee zich dudelijk laoten heuren tiejens der zeuktoch naor een soortgenoot. Van de meeste olieven wönnen oliefolie emaak. De eerste (kouwe) parsing geef de kwaliteit extra vergine/extra vierge. Der kump zelfs weg en were een vruchdragende benanenboom veur.

Oek wönnen der veule druven verbouwd veur 't maken van wien. In 't wiengebied Kalipado steet de grootste wienfebriek van 't eilaand (Callinico Wines), dee deur de eerdbeving van 1953 verrieneweerd wönnen, mer in 1968 (vuuftien jaor laoter), deur de jonge van de eigenaar weer opniej op-estart wönnen, dee daormee in de vootsporen van zien pa trejen. De febriek hef noen een capaciteit van 2500 flessen per ure (2004).

De meuite weerd

Een antal plaosen op 't eilaand bin zeker de meuite weerd um te bekieken:

• Zakynthos-stad/Zante-stad (de heufstad), mit veule winkels en een grote haven.
• Volimes, bekend vanwegen zien haand-emaken waand- en vloerklejen.
• Agios Sostis, mit uutzichte op Marathonissi, 't eilaand veur de kus dat de vorm van een schilpad hef.
• Agalas, hier he-j een gallerieje in een ouwe schoele
• Macherado, mit de Agia Mavra-karke (bejevaortsoord) en hoog boven 't darp 't klooster Panagia i Eleftherotria.
• Kambi, mit 't grote witte kruus (van vuuftien meter hoog) ter herinnering an de partizanen, dee tiejens de Griekse Burgeroorlog in zee egooid wönnen deur de vieaand.
• Koukounaria
• Limni Keriou, helemaole in 't zujen mit zien ouwe pekbronnen waor lange tied de scheepswanen mee toe esmeerd wönnen.
• Macherado mit de bejevaortskarke, de Agia Mavra (19e eeuw). De kampenile hef een mooiklinkend klokkenspel. Buten de plaose he-j nog 't nieje klooster Panagia i Eleftherotria mit een fraaie iconostasis (waandschildering).
• Akra Gereki, een belangrieke schilpaojenbreudplaose.
• Agios Nikolaos en Akra Skinari, vanof hier bin de blauwe grotten te zien.
• Laganas, hier he-j veule disco's, dee jonge vekaansiegangers lokken, mer waor oek de zaandstranen an de baai een bepaolde tied van 't jaor bescharmp gebied bin, umdat daor de schilpaojen der eiers legen. Vandaor dat der een National Marine Park of Zakynthos is. Op de bordjes steet an-egeven, dat in dit gebied de schilpaojen neet versteurd maggen wönnen tiejens 't breudseizoen.
• Navagio is één van de meest efotograferen stranen van Zakynthos. Op 't kleine straand lig 't vrak van een estraande boot waormee siggeretten esmokkeld wönnen. 't Straand hef zich laoter rond de boot op-ebouwd. 't Straandjen, dat langes een stikke rotskus lig, ku-j allinnig per boot bereiken.
• Op Zakynthos liggen oek de ressen van de Heilige Dionysios.

Toerisme

't Eilaand is veur veule meensen een geliefde vekaansiebestemming. Aandere eilanen ku-j bezeuken mit een vissersboot bieveurbeeld vanof de haven van Agios Sostis zoas 't eilaand Kefalonia. Der geet oek een grote veerboot van de stad Zakynthos naor 't vastelaand. Bie Laganas steet oek de rewiene van 't kesteel Sarakino, dat in de 18e eeuw ezien wönnen as 't mooiste gebouw van 't eilaand, mer tiejens de eerdbeving van 1953 in-estort is.

Tegensworig wönnen alle nieje gebouwen eerdbevingbestendig ebouwd, deur gebruuk te maken van betonnen muren en vloeren van extra zwaor ewapend beton.

Bestuur

Departement

Het departement Zakynthos kent buiten het eiland Zakynthos zelf, geen andere noemenswaardige eilanden.

Plaosen

Deur de bestuurlijke herindeling (Programma Kallikrates) wönnen de departementen of-eschaf vanof 2011. 't Departement Zakynthos wönnen een regionale eenheid (perifereiaki enotita). Der wönnen oek gemeentelijke herindelingen deur-evoerd, in de tebel hieronder “GEMEENTE” eneumd.

Plaose	Heufplaose (vrogger)	Poscode	GEMEENTE	Heufplaose van de gemeente
Alykes	Katastari	290 90	Zakynthos	Zakynthos
Arkadion	Vanato	291 00	Zakynthos	Zakynthos
Artemisia	Machairado	290 92	Zakynthos	Zakynthos
Elatia	Volimes	290 91	Zakynthos	Zakynthos
Laganas	Pantokratoras	290 92	Zakynthos	Zakynthos
Zakynthos		291 00	Zakynthos	Zakynthos

Uutgaonde verwiezing

• Zakynthos Online

37.79222222222220.757777777778

Commons: Zakynthos - plaetjes, filmkes en/of geluudsbestaanden.