Tufsteen

Tuffeten in den Eifel. De jöngere tuffeet (rechts) is diskordant of-ezat oaver de oldere tuffeet (links). De hookdiskordantie guf aan dat de tuffeten van twee verskillende bronnevulkanen ofkumsteg bunt.

Tufsteen, tuf of tuffeet is n ofzettings gesteente van vulkanies materioal; vulkanoklasties gesteente. Et kan bestoan uut verskillende samenstellingen, moar de kiemloage is vulkaniese asse. Hierin bunt gesteentebrökstukke van de vulkane of et umrengenden gesteente te vinden. Ok vulkanies glas (obsidiaan) wödt in tuffeet an-etroffen.

Tuffeten wödt of-ezet rundumme ontplofboare vulkane, woar asse de umrengende loch in estotten wöd en neerkump mit de gesteentebrökstukken "drievend" in de assenkiemloage. Mooie en geologies jönge (midden-Tertiair tot Pleistoceen olderdom) veurbeelden bunt te vinden in den Eifel.

Gebruuk

Tufsteen is ne vri-j zachte steensoorte dee makkelek te bewarken is. Andere benamingen veur tufsteen bunt doefsteen en dufsteen. Gemalen tufsteen neumt ze tras. Tras wöd too-eveugd an metselspijs um te zörgen veur n vaster en waterdicht metselwark. In de Middeleeuwn wodden et in Nederlaand mangs ebruukt as bouwmaterioal. Et wödden toon veural ewonnen in den Eifel. Vanof de 13de eeuwe wodden et tufsteen steeds vaker vervongen deur andere steensoorten dee uut de plaatseleke umgeaving ehaald konden wödden zoas baksteen'.

Bi-j den bouw van kasteel Vredenburg in Utrecht in de 16de eeuwe wodden ok tufsteen ebruukt. De Italiaanse stad Orvieto is op n hoog vlak van tufsteen ebouwd.

Der wodt verskillende soorten tufsteen beskreaven:

• ettringer tufsteen
• romer tufsteen
• weiberner tufsteen
• peperino grigio
• peperino rosato