Sunt Maikel-lien

Uut Wikipedia, de vrye encyklopedy
De Sunt Maikel-lien mit wat belaangrieke monumìnten aangeven

De Sunt Maikel-lien is n zonuimde leylien dij begunt ien de Atlantische Ozeoan op t Azorenaailaand São Miguel (Sunt Maikel) en over t Britse kontinìnt lopt van St. Michael's mount ien Kornwaal noar Hopton ien Norfolk en den deur de Noordzee over Hellegolaand en den deur Noordfraislaand hìn en via Langelaand noar t zuden van Seelaand en over Skoane hail noar St. Petersbörg tou. Op dizze lien stoan belaangrieke olle monumìnten van neolitische baauwwaarken tot middelaiwse domkìrken en kestail. Aal baauwwaarken binnen of neolitisch tot megalitisch, of hebben wat tou doun mit Sunt Maikel of Maria Magdalena of mit de tìmpelders. Kestailen dij op dizze lien baauwd binnen stoan voak op n ollere hoogte, zo as Cadbury Castle, dat nou ôfbroken is, môr wat op n ollere hoogte ston, verliekensboar mit Silbury Hill, dij ook op dizze lien ligt.

Ien de esotherische waitenschop gaait man der vanoet dat dizze lien n spirituele energielien is dij over de eerde lopt en woar van "ôftapt" worden kin, deur middel van grafkoamers of hunebedden, kìrken, kellers ien kestailen, kunstmoatege holle hoogten, stainsirkels enzowieder. Stonehenge is middelkerwies de bekendste hiervan. t Baauwen van monumìnten op dizze lienen wordt verleken mit akupunktuur op t lichoam. Der wordt maind dat dizze waitenschop bekend was bie de tìmpelders en vrijmezzelders en gehaimholden is veur de rest van t vôlk.

Kundalini symbool

De lien is nuimd noar Sunt Maikel omdat veul van de kìrken, kestailen en lougen noar hom vernuimd binnen, van t begun aailaand São Miguel tot aan t Mikhailovsky kestail ien St. Petersbörg. De lien wordt ook wel de lien van Sunt Maikel en Sunt Maria nuimd, den ook n ìnde kìrken en kloosters op dizze lien binnen noar Maria Magdalena nuimd. Veur t gemak wordt dij twijde voak votlôten. De lien is aans gain lieke lien. Om de lien hìn zit, liek as de kundalini twij lieke golven van n poar kilometer woar om en om dizze monumìnten op stoan. De Sunt Maikel-lien kruust bie t St. Maikels aailaand de Apollo-Athene-lien en bie Avebury de Rooslien (Rosslyn).

De lien gaait ook nog wieder deur, tot ien de Amazône en deur t Titicaca meer en laangs Tiwanaku, en aan aander kaant wied Röslaand ien en komt oetìndelk weer op t zulfde punt terècht, môr wordt boeten Uropa gain Sunt Maikel-lien meer nuimd.

De maiste waitenschoppers verwaarpen de theorie van leylienen en zèggen dat dit touvaal is.