Stichting Drentse Taol

Uut Wikipedia, de vrye encyklopedy

De Stichting Drentse Taol was een stichting met as doelstelling 't bevörderen van 't gebruuk van 't sproken en schreven Drèents. In meert 2007 is de stichting met 't maondblad in de Drentse taol Oeze Volk en Stichting Het Drentse Boek saomengaon in 't Huus van de Taol. Dizze neie organisaotsie hef in meert 2008 de deuren lös edoan in Beilen.

't Waark van de Stichting Drentse Taol was onderverdeeild in veer beleidsterreinen:

Taolpromotie[bewark | bronkode bewarken]

Taolpromotie umvatte veur Drentse Taol dinger as 't organiseren van lezings, 't Drents dictee, kaarkdiensten in 't Drents en de maond van 't dialect (in meert, Meertmaond-Dialectmaond), 't verzörgen van internetpagina's en Tekst-TV in 't Drèents en de oetgaove van 't kwartaolblad De Taolkraant (in saomenwaarking met Het Drentse Boek).

Drentse Taol hef veur 't Drèents een deur de pervincie Drenthe erkend spellingsysteem maokt. Ok organiseerden ze 't Drèents dictee, dat in 2006 veur de eerste keer rechtstreeks op TV Drenthe oetzonden weur.

Naost de activiteiten die Drentse Taol zölf ontwikkelde was ok de loketfunctie slim belangriek. Veur aal vraogen en opmaarkings op 't gebied van 't Drèents kunden mèensen terecht bij Drentse Taol.

Onderwies[bewark | bronkode bewarken]

Op onderwiesgebied weuren verschillende activiteiten ontwikkeld veur jong en old. In verschillende plaotsen worden - now deur 't Huus van de Taol - cursussen Drèentse taol en cultuur geven veur beginners en veur mèensen die wat meer vörderd binnen. Daorbij kommen ok volkskunde en spelling an de orde.

Literatuur[bewark | bronkode bewarken]

Drentse Taol warkten veur de fusie töt 't Huus van de Taol al saomen met Het Drentse Boek, die boeken en meziek in in 't Drèents en oaver Drenthe oetgef.

Drentse Taol huld zuch onder aandere gangs met 't laoten maoken van videoportretten van bekende Drentse schrievers en met 't inrichten en toougankelijk maoken en holden van 't Drents Letterkundig Documentatiecentrum.

Taolwetenschap[bewark | bronkode bewarken]

Drentse Taol ondersteunde 't Drents as onderwaarp van wetenschappelijk onderzeuik. Dit onderzeuik stund neeit op zichzölf, mor weur waor meugelijk tooupast op aandere beleidsterreinen, bijveurbeeld 't onderwies.

Oetgaonde verwiezing[bewark | bronkode bewarken]