Nije kiek op Paulus
De Ni'je Kiek op Paulus is 'n veulgebruukte tarm umme 'n belangrieke ontwikkeling in n 20ste eewe an te duden op t wetenskaplike onderzuuk naor de apostel Paulus.
De meest op 't ooge springnde verni'jing is eur kiek op de typiese pauliniese "warken van de wet". Voolgens exegeten die deankt op de meniere van de Reformator Maarten Luther, slöt dit op 't perberen Gods gunst te verdienen deur 't strak-an naoleven van de mozaiese wet, of meer algemien: regels die deur de karke wörd op-elegd. De deankers van de Ni'je Kiek stelt echter dat disse kiek op de Tora nie is terugge te vinnen in 't Jeudendom van n eersten eewe. De tarm "warken van de wet" slöt voolgens eur op n nationalisties misbruuk van de, op zichzölf goeie, wet van Mozes: Paulus' geleufsgenoten perbeerden deur disse nao te leven zich te onderscheiden, mar maakten t zo nie-Jeuden onneudig muilik zich bi'j t (toe nog grotendeels Jeudse) kristendom te voegen.
Disse en aandere verni'jende interpretaties van de Ni'je Kiek led töt n meer 'Jeudse' Paulus en n kiek die simpathieker stiet tegenover t Jeudendom. Iene van de belaangen van disse stroming is dan ok n weerwoord te bieden tegen on-Jeudse of zölfs stiekume antisemitiese lezings van Paulus die voolgens eur sunds de Reformatie gebruuklik bint onder protestaanten. Kritieken, waoronder de konservatieve theoloog John Piper, vreest echter dat deur eur heugere weerdering van de Jeudse wet Gods genaa wördt onder-ewerdeerd.
|
Dit artikel is eskreaven in et sallandske dialekt van 't Vechtdal, in de Algemene Nedersaksiese Schriefwieze. |