Mohammed

Uut Wikipedia, de vrye encyklopedy

Mohammed ibn 'Abdallah, ook wal eskreewn as Muhammed of Muhammad, was n profeet van de stam van de Koeraisj oet Mekka in Saoedi-Arabië. Hee leawdn van ongevear 570 töt 8 juni 632. Hee bracht de wearldgodsdienst islam töt t volk. Mohammed was neet allene n belangriekstn profeet vuur n Islam, mear zin leawn is ook n vuurbeeld vuur alle moslims.

Op disse manere is Mohammed zin leawn neet lös te zeen van n Islam, umdet det wat oawer um in de euldste weln steet, eskreewn is duur Moslims.

Leawn[bewark | bronkode bewarken]

Mohammed wör in ongevear 570 in Mekka geboorn, in t joar wat bie de moslims bekeand steet as t Joar van n Olifant. Zin vaa 'Abd Allah, n Mekkaans haandelsman, köm gedoernde ne haandelsreaize oet de tied toew at Mohammed nog egeet neet geboorn was, en zin moo störf n antal joar later, woerduur at'e as wees in t hoes van zinnen eum Abu Talib terechte köm.

As jonge wör'e met n stel pleegooldn met esteurd de weuste in, umdet de leu in de Arabise wearld toertieds geleuwdn det det good vuur n wich zien gestel zol wean, zowal lieflik as geestelik. Dr beent oonder Moslims populaire verhaaln det twee engeln um in disse tied opzochn, zin herte oet de böste nömn, t waskn en wier terugge plaatsn.

As jongkearl gung'e vake met op haandelsreaizn en kreeg doarduur nen gooen bienaamn (al-Amin, wat "n betrouwbaarn" beteeknt). Eene van de belangriekste haandelsleu oet toewmoalig Mekka was Gadidja, ne 40-joarige weddevrouwe. Doar trouwdn'e met, en wör zo baas oawer Gadidja zinne haandelsoondernemmige.

Openbarige en toonemnde invlood[bewark | bronkode bewarken]

Toew at Mohammed 40 joar was (n belangriek getal in de Arabiese wearld) har hee de gewoonte um zik terugge te trekn um te mediteern, woervuur at hee noar n boarg Hira gung. Op n dag in t joar 610 heurdn'e ne stemme den at um opdreagn: "Zegnt noa:..." Dit was de stemme van n engel Gabriël den at um de verzn vuur zea van wat later wör ebeundeld töt de Koran. Noa dee tied kreeg'e regelmoatig openboariges van denzelfdn engel.

Vuurdet de Islam besteund, was Mekka ook al n belangriek religieus peunt. De verskeaidene völke gungn good met mekoar umme en dr besteund polytheïsme (dr wördn meardere godheedn tegeliek anbeedn). De Koeraisj hadn as taak t helpn en verzörgn van de völle pelgrims dee at noar Mekka kömn. Mohammed heurdn ook bie dissen stam. Det hee dan ineenn met t verhaal oawer "Éenn God" köm, was dus nen doorn in t oge van völle van zinne stamgenötn, dee at juust leawdn van t mear-goodndom. Op n bepoald momeant was Mohammed zin leawn nit zeker, en vluchtn doarumme noar Medina. Doar gung'e verdan met preakn, en kreeg völle invlood, zelfs zodöanig det'e as börgemeaister wör ekeuzn.