Máxima Zorreguieta

Prinses Máxima van Nederland

Máxima Zorreguieta (geboren in Buenos Aires, Argentinië, op 17 mei 1971) is Prinses van Nederland, Prinses van Oranje-Nassau en is de vrouw van Prins Willem-Alexander, de Nederlanse kroonprins. Officieel heet ze Heure Koninklijke Hoogheid Máxima Prinses van Nederland, Prinses van Oranje-Nassau, mevrouw Van Amsberg. Ze kump oorspronkelijk uut Argentinië. Samen mit Prins Willem-Alexander het ze drie deres, Amalia (2003), Alexia (2005) en Ariane (2007).

Levensloop

Heur jeugd en vroggere wark

Prinses Máxima is geboren as de eerste deren van Jorge Zorreguieta en Maria del Carmen Cerruti. Ze kreeg laoter nog twee breurtjes en een zusjen; Martín, Juan en Inés. Ok het ze drie halfzusters uut een eerder huwelijk van heur vaor; Dolores, María en Angeles. Máxima greuide op in een klein appartement in de straot Uriburu, in de rieke wiek Barrio Norte in Buenos Aires. De femilie brocht de zoemervekanties deur in Mar del Plata. Tiejens de wientersportvekanties verbleef de femilie Zorreguieta in 't eigen vekantiehuusjen in Bariloche, een bekend Argentiens vekantieoord, waor oek Prins Bernhard gien onbekende was en waor Máxima jaoren laoter oek mit Willem-Alexander ging skiën.

Máxima ging naor de middelbaore schoel op 't Northlands College in Buenos Aires, een op Britse aristocratische tredisies erichte opleiding. Naodat ze klaor was mit heur studie ekenomie an de Universidad Católica Argentina (Kattelieke Universiteit van Argentinië) gung ze van 1995 tot 2000 in Niej-York waarken veur de banken HSBC, Dresdner Kleinwort Benson en Deutsche Bank. In april 1999 ontmoette ze tiejens een feest in Sevilla de Nederlanse kroonprins Willem-Alexander. Samen mit Willem-Alexander ging Máxima in augustus 1999 vuuf dagen op vekantie in 't Argentiense vekantieoord Bariloche. Tiejens die vekantie is Willem-Alexander veur-esteld an de ouwers van Máxima. In de Nederlanse pers verschenen daornao de eerste geruchten over een meugelijke liefdesrelasie. Een jaor laoter verhuusde Máxima naor Brussel.

Verloving

Kort naodat bekend was eworren dat de relasie mit Willem-Alexander serieus was, kwam de Nederlanse pers der achter dat de vaor van Máxima, Jorge Zorreguieta, staotssikketaoris van Landbouw was tiejens de militaire juntaregering, oek wel bekend as de "Vule Oorlog", van Jorge Videla in Argentinië (april 1976 tot en mit meert 1981), waorbie enkele duzenden tegenstanders van 't militaire bewiend edwungen verdwenen of in gevangenissen estopt worden. Willem-Alexander had in reactie daorop de pers naor een brief van oud-dictator Videla verwezen as bron van infermasie.

In Nederland worde eprotesteerd tegen een huwelijk van de kroonprins mit de deren van disse kerel, van wie as ze dochten dat ie in ieder geval ofwist van alle misdaodighejen tiejens zien ministerschap. Een oenderzeuk, via een geheime opdracht van minister-prissedent Wim Kok an pref. dr. Michiel Baud, had as conclusie dat Zorreguieta ofwist van disse edwungen verdwieningen mar dat 't "praktisch uut te sluten is" dat Zorreguieta in de periode van zien regeringsdeelname "persoonlijk betrökken eweest het bie de poletieke oenderdrukking of schending van de minserechten". Willem-Alexander bevestigde tiejens een vraaggesprek dat ie wist dat zien schoonvaor van tenminste één edwungen verdwiening ofwist (disse persoon was volgens Willem-Alexander weer terug-evunnen), waormee die de risseltaoten van 't oenderzeuk ofdee as minder belangriek. Mit tact van Wim Kok en diplomaot en minister van Staot Max van der Stoel is veurkommen dat Jorge Zorreguieta bie 't huwelijk van zien deren kon wezen.

Tiejens de bekendmaking van de verloving zei Máxima over de rol en steun van heur vaor an de dictetuur dat heur vaor van niks niet ofwist en juust zien best dee veur de Argentiense landbouw, en in een laoter vraaggesprek neumde Máxima de conclusie van Michiel Baud slechs "zien mening".

Um Máxima in te wijden in 't hofleven en heur etiquette en protecol bie te brengen worde hofdame Lieke Gaarlandt an-esteld.

Huwelijk

Op 17 mei 2001, heur daartigste verjaordag, is Máxima Zorreguieta bie Koninklijk Besluut 't Nederlanderschap verleend op groend van artikel 10 van de Riekswet op 't Nederlanderschap. Dit was neudig, umdat ze deur heur huwelijk lid zou worren van 't Koninklijk Huus en veur dit lidmaotschap 't Nederlanderschap neudig is.

Huwelijk van Máxima Zorreguieta mit de Prins van Oranje

Huwelijk in de Grote Zaol van de Beurs van Berlage

Op 3 juli 2001 nam de Verenigde Vergaodering van de Staoten-Ginneraol een deur de regering in-ediende wet an um toestemming te geven an de Prins van Oranje um mit Máxima Zorreguieta te trouwen.

Standerd van prinses Máxima

Bie Koninklijk Besluut van 25 jannewaori 2002, nummer 41, is bepaold dat Máxima Zorreguieta Cerruti, as de brulft mit de prins begon, dat ze de titels prinses van Nederland en prinses van Oranje-Nassau mit 't predikaot Koninklijke Hoogheid zou kriegen. Ze het disse titels dus niet alleen mar umdat 't een hoffelijkheidstitel is. Mar dit betekent nog gien verheffing in de aodelstand. Lejen van 't Koninklijk Huus beheuren namelijk niet tot de Nederlanse aodel mar vormen een eigen oenderscheiende groep waorvoor are wettelijke regels gelden. Enkele lejen van de koninklijke femilie, die niet beheuren tot 't Koninklijk Huus, beheuren wel tot de aodel, namelijk prins Friso van Oranje-Nassau en zien kienders as graaf/gravin van Oranje-Nassau en jonkheer/jonkvrouw van Amsberg. Daornaost oek de kienders van prinses Irene die as prins/prinses de Bourbon de Parme in-eliefd worden in de Nederlanse aodel.

Toemaolig minister-prissedent Wim Kok verklaorde, dat der gien bezwaor tegen was dat ze in 't maotschappelijk verkeer De Prinses van Oranje eneumd wort.

't Is zelfs gebrukelijk dat de evoerde titel(s) van de man deur zien vrouw as hoffelijkheidstitel evoerd wort, oek al as ze (eventuele) eigen aodellijke titels het. In de praktijk wort prinses Máxima zowel officieel as in 't maotschappelijk gebruuk an-espreuken as 'prinses van Nederland'.

Prinses Máxima die de bouw derin het

Bie 't volgende Koninklijk Besluut van 25 jannewaori 2002, nummer 42 worde an Prinses Máxima een eigen wapen en een oenderscheidingsvlag egeuven.

Op 2 febrewaori 2002 het de burgemeister van de Amsterdam, Job Cohen, 't huwelijk in de Grote Zaol van de Beurs van Berlage te Amsterdam edaon. De kaarkelijke inzegening was in de Nieje Kaark in Amsterdam, en is uut-evoerd deur dominee Carel ter Linden (lid van de toemaolige Nederlans-Hervormde Kaark). De kattelieke prinses Máxima mos eerst instemmen mit een hervormde, protestanse opvoeding van de eventuele kienders, wat 't huwelijk in de ogen van de Rooms-Kattelieke Kaark kaarkrechtelijk ongeldig maakt, vanwege 't huwelijksbeletsel. Veural oender een minderheid van riffermatorische Nederlanders, trouw an 't huus van Oranje, was der in 't begin bezwaor tegen een rooms-kattelieke vrouw.

Miljoenen minsen die tillevisie zatten te kieken in binnen- en butenland volgden de trouwplechtigheid. Twee momenten die laoter vaak herhaold zouwen worren waren de traonen van Máxima tiejens Argentiense tangomeziek, toe Carel Kraayenhof 't nummer Adios Nonino ("Dag Vaodertjen") speulde en de balkonscène mit "de kus".

Gezin

Máxima en Willem-Alexander hen drie kienders:

• Catharina-Amalia Beatrix Carmen Victoria (7 december 2003)
• Alexia Juliana Marcela Laurentien (26 juni 2005)
• Ariane Wilhelmina Máxima Ines (10 april 2007)

Maotschappelijke taken

Nog veur heur huwelijk mit kroonprins Willem-Alexander is Máxima begonnen mit een intensieve verdieping in de Nederlanse maotschappie, deur een inburgeringscursus te volgen. Al gauw nao heur kennismaking mit Willem-Alexander begon ze Nederlans te leren en mos ze der eigen verdiepen in allerlei aspecten van de samenleving, zoas de geschiedenis, 't staotsrecht, de rol van 't koningshuus en de Nederlanse gebruken en gewoentes. Naodat hofdame Ottoline ('Lieke') Gaarlandt-Van Voorst van Beesd Máxima had eleerd over 't protecol en de etiquette, worde in 2002 Pien Zaaijer, heufd van de ofdeling Bestuur en Wetgeving van 't ministerie van Binnenlanse Zaken, as persoonlijk raodgever van de prinses an-esteld.

Tiejens een kennismakingstournee deur Nederland in de maonden veur heur huwelijk leek ze te genieten van de overweldigende belangstelling van de media. In 't eerste jaor nao heur huwelijk ging ze deur mit 't kennismakingstournee op de Nederlanse Antillen en Aruba.

Prinses Máxima het de tied eneumen um te verzinnen wat as ze allemaol kon doen binnen de monarchie en de samenleving. Ze wou daormee veurkommen in dezelfde valkulen te stappen as heur schoonvaor prins Claus, die in zien pogingen um zinvol maotschappelijk waark op te bouwen, regelmaotig preblemen kreeg mit de bepaarkingen die deur de ministeriële verantwoordelijkheid esteld worren an lejen van 't Koninklijk Huus. De algemene opvatting was dat prinses Máxima meer vrieheid mos hen as heur schoonvaor toe had.

Al gauw worde dudelijk dat Máxima had an-egeuven iets mit frullie uut 't butenland te willen doen, waorop de kemmissie PaVEM bedocht worde. Sins september 2003 is de prinses lid van disse kemmissie (Participatie van Vrouwen uit Etnische Minderheden) die de regering raod geeft op gebied van integrasie van minderhejen. Ze is veural bezig mit vraagstukken rond de integrasie van allochtone frullie. Disse kemmissie kwam negetief in 't niejs toe der een stel allochtone frullie uut-estapt waren. Ze kregen 't geveul dat ze een soort "excuusallochtoon" waren, en as ze zelf ideeën han, dat dit alleen uut-evoerd mocht worren oender de naam PaVEM. Oek zeien ze dat ze niet zelf mit de pers mochten praoten. De pers meldde oek dat de conclusies niks niejs an infermasie brochten. Nao disse kretiek besleut Paul Rosenmöller, die oek lid was van de kemmissie, 't geld dat ie as lid kreeg terug te storten. Hie was de enigste die op de kretiek reageerde.

An 't einde van heur intreductiepregramma gaf ze op 14 febrewaori 2005 een vraaggesprek op tillevisie an 't programma NOVA. Daorin blikte ze terug op heur eerste jaoren in Nederland en gaf ze heur visie op de integrasie van allochtonen. 't Pregramma trök 2,6 miljoen kiekers, een record veur 't pregramma.

Máxima is beschaarmvrouw van 't Oranje Fonds. Ze oendersteunt oek vaak ze heur schoonmoer en man in 't uutvoeren van der officiële verplichtingen. In oktober 2004 nam ze zitting in de Raod van Staote waor konegin Beatrix veurzitter van is. Prins Willem-Alexander het al sins zien achttiende zitting in de raod. 't Is in de wet vast-eleid dat 't staotsheufd veurzitter is en de troonopvolg(st)er op zien of heur achttiende zitting in de raod kriegt. In 2005 is Máxima lid eworren van de groep raodgevers van de VN-kemmissie veur 't Internasionaole jaor van 't Microkrediet en beschaarmvrouw van de Nederlanse padvienders. Ze volgde Prins Claus op. Ze is de deupmoer van prins Sverre Magnus van Noorwegen en gravin Leonore, deren van prins Constantijn en prinses Laurentien.

Trivia

• Op 18 oktober 2001 was Máxima betrökken bie een verkeersongeval. Ze kwam vanof een uutrit van peleis Huus ten Bosch in Den Haag en gaf gien veurrang an een veurbiegaonde auto, waorop ze hum anreed. De bestuurder van die auto brak deur de botsing zien been. In de rechtszaak die volgde, worde Máxima veroordeeld tot 't betaolen van een kwart van de schao. De rest van de schao mos 't slachtoffer zelf betaolen, umdat ie te hard had erejen en zien veiligheidsgordel niet dreug. Daornaost was de weg niet veu deurgaond verkeer bedoeld. De naam van Máxima Zorreguieta is veranderd in 't repport van de pelisie.
• In september 2007 was der armeu vanwege een rede, die ze had egeuven bie de prissentasie van 't repport "Identificasie mit Nederland". In heur toespraak zei ze bieveurbeeld dat ze 'de' Nederlander niet evunnen het en dat 'de' Nederlanse identiteit niet bestaot. Disse uutspraken leien tot een storm van kretiek. Minister Vogelaar "betreurde" de ophef, ze verklaorde dat ze de toespraak "van teveuren had elezen" en oek vund dat der "gien of-eroende Nederlanse identiteit bestaot". De prinses gaf laoter an dat "diep eraakt" was en dat ze "verkeerd begrepen" was. Bronnen rond 't hof gaffen an, dat der niet goed was nao-edocht over de pesisie van de prinses bie de prissentasie van 't repport.
• De moer van langebaonschaotser José Ignacio Fazio is een volle nicht van de moer van Máxima. Daormee is Fazio een achterneef van de prinses.

Stamboom

Stamboom van Máxima Zorreguieta
Grootouwers	Juan Zorreguieta (1898-1959) x 1925 Cesira Stefanini (1901-1999)			Jorge Cerruti (1911-1992) x 1942 María del Carmen Carricart (1914-1999)
Ouwers	Jorge Zorreguieta (1928) x 1971 María del Carmen Cerruti (1944)
Máxima Zorreguieta (1971) x 2002 Willem-Alexander der Nederlanden (1967)
Kienders	Amalia (2003)		Alexia (2005)		Ariane (2007)

Uutgaonde verwiezing

• Prinses Máxima op de webstee van 't Koninklijk Huus

Commons: Prinses Máxima der Nederlanden - plaetjes, filmkes en/of geluudsbestaanden.

Dit stuk is eschreven in 't Putters