Lissabon

Uut Wikipedia, de vrye encyklopedy
Lissabon in t rood op ne kaarte van Portugal

Lissabon (in t Portugees: Lisboa, Tweantse oetsproake /'lɪsəbɔ̃/, Portugese oetsproake /liʒˈβoɐ/) is de heuwdstad van Portugal. t Is ook de grötste stad van det laand, met binn de offisjele greanzn 547.631 inwonners[1] op ne oppervlakte van 84,8 km². t Versteadelikte gebeed um Lissabon strekt zik wied boetn de offisjele greanzn oet. Doar wont nog es 3 miljoen leu[2] op ne oppervlakte van 958 km², woermet Lissabon t neegnde-grötste versteadelikte gebeed van Europa is. Ongevear 2.831.000[3][4] leu wont dr in de Metropool Lissabon (wat ongevear 27% van t hele inwonnertal van Portugal is). Lissabon is de meest westerlik lignde grote stad van Europa, de meest westerlike heuwdstad en de ennigste an de Atlantiese kuste en de Tagusrivier.

Lisbon is erkeand as wearldstad um de belangrieke plek wat t hef in finansjele zaakn, (internasjonaaln) haandel, media, vermaak, keunst, oonderwies en toerisme[5][6] t Is ene van de ekonomiese middelpeuntn van t wearlddeel, met nen gröainden finansjeeln tak en de grötste/tweede-grötste zeecontainerhaawn an de Atlantiese kuste van Europa.[7] De lochthaawn, Lisbon Portela Airport, verwoarket joarliks ongevear 13 miljoen leu. Lissabon steund in 2007 25ste op de Lieste van beste steadn um in te wonn, volgns t blad Monocle.[8] Lissabon is noa Istanboel, Rome, Barcelona, Madrid, Athene en Milaan de drokstbezöchte stad van Zuud-Europa, met 1.740.000 touristn in 2009.[9] De strekke Lissabon is de riekste strekke van Portugal, met nen koopkracht van gemiddeld €26.000,-- per heuwd van de bevolking (4.7% heuger as t gemiddelde in Europa).

Völle internasjonale grote bedriewe hebt n heuwdkantoor in Lissabon, en t is doarduur de neegnde stad van de wearld wat t antal internasjonale bedriewe angeet.[10] In Lissabon zit ook de Portugese regearing en n Presideant wont dr.

Lissabon is ene van de euldste steadn van de wearld. Julius Caesar maakn dr n municipum van wat he Felicitas Julia neumn, boawnop n naam Olissipo. Noa at t vanof t viefde joarhoonderd duur Germaanse stämme regeard wör, köm t in haandn van de Moorn in t achtste joarhoonderd. In 1147 wör t wier terugge wunn tiedns n Tweeden Kruustocht oonder leaiding van Alfonso Henriques. Vanof dee tied hef t ene van de belangriekste politieke, ekonomiese en kulturele middelpeuntn van Portugal ewest.

Det Lissabon de heuwdstad van Portugal is, ligt noargns vaste legd. t Is duur de joarn zo gröaid en dus ne de fakto heuwdstad. In de stad zitt twee Buro's van de Europese Unie: t Europese controlecentrum vuur Drugs en Drugsverslawing (EMCDDA) en t Europese Buro vuur Zeeveailigheaid(EMSA). Ook de Gemeenskop van Portugeestalige Laandn hef t heuwdkantoor in Lissabon.

Lissabon hef twee plekn dee't op de Wearldoarfgoodlieste van UNESCO stoat: Belém Toorn en t Klooster van Jerónimos. In 1994 was Lissabon de Europese Heuwdstad van Kultuur en organiseern ne Wearldtentoonstelling in 1998.

Dr is in Lissabon n Middellaandse Zeeklimaat. t Hef woarme weenters, met gemiddelde temperatuurn van 15 °C daagns en 8 °C 's nachtes, van desember töt an februwoari. t Zommer doert gemiddeld van mei töt oktober, mer ook in november, meart en april kan t dr al boawn de 20 °C wean.

Verwiezingn[bewark | bronkode bewarken]

  1. Censos 2011 – Resultados Preliminares
  2. Demographia: World Urban Areas, meart 2010
  3. United Nations Department of Economic and Social Affairs, World Urbanization Prospects (2009 revision), (United Nations, 2010), Tabelle A.12. Gegeewns vuur 2007.
  4. Rui Campos, Pedro Senos. Statistics Portugal. Skreewn op 30 juni 2009. Bekekn op 8 juli 2009.
  5. The World According to GaWC 2010. Globalization and World Cities Study Group and Network, Loughborough Universiteat. Bekekn op 3 meart 2009
  6. Inventory of World Cities. Globalization and World Cities (GaWC) Study Group and Network. Bekekn op 1 desember 2009.
  7. "Avance del Plan Territorial Sectorial de la Red Intermodal y Logística del Transporte de la Comunidad Autónoma del País Vasco" – Eusko Jaurlaritza – Gobierno Vasco
  8. Monocle.com. Monocle, oetgawe Juni 2009. Bekekn op 26 juni 2010
  9. Bremner, C. Euromonitor International's Top City Destination Ranking. Euromonitor International. Skreewn op 10 januwoari 2011. Bekekn op 10 januwoari 2011
  10. "Lisboa é 9ª cidade que mais recebe congressos internacionais" – Agência LUSA