Lemele
Lemele is een dörp in de gemiente Ommen in de previnsie Aoveriessel, 't lig an de voet van de Lemelerbarg. Op 1 januari 2008 had Lemele 1.672 inwoners. De naam Lemele is of-eleid van 't leem dat vrogger in en umme de Lemelerbarg is evunnen. Uut vondsten bie ofgravingen is ebleken dat 2000 jaor veur onze jaortelling mèènsen al op de barg ewoond hadden. De eerste keer dat Lemele in olde geschriften stiet vermeld is 1474.
[bewark] De Tichelerieje
De in Leiden geboren Carel Godefroi de Moen koch in 1840 een lap grond an de Ledeboerweg um der een stienpannen- en tichelfebriek op te richen. Onder de naam De Moen en Kompejons konnen mit medewarking van ds. Van Raalte, Dirk Blikman Kikkert en Elias Ravenhorst zien plannen wödden uut-evoerd. De Tichelerieje beud wark an zo'n dartig mèènsen. An de voet van de Lemelerbarg had e een mooi stekkien umdat leem de belangriekste grondstof van de febriek was. Toen in 1855 't Aoveriessels kenaal tussen Almelo en Zwolle werd an-eleg, werd de febriek naor de Kingmaweg an dit kenaal verhuust. Mä in de loop der jaoren vertrokken alle kompejons stuk veur stuk uut de stienfebriek. As leste bleef Dirk Blikman Kikkert aover en verkoch zien andeel an Marten Kingma. Tien jaor daornao had Marten Kingma de stienfebriek ummebouwd in een zuvelfebriek umdat de melkcentrifuge werd uut-evunnen.
[bewark] Recreasie en toerisme
Lemele biedt met zien völle campings een uustekend plekkien veur de toeristen die wilt fietsen in de umgeving en wilt wandelen aover de Lemelerbarg. An 't Zandeinde is een zörgboerderieje, an de Karkweg zit een eetkefee met een terras in de zunne, an de Lege Esweg is een kleine golfbane, en an de Korteveldsweg zit disco Zaal Dijk. Ok veur gehandicapten is plek in Lemele; an de Lemelerweg zit vekaansiecentrum de Imminkhoeve.
