Krödde (tiedschrift)

Uut Wikipedia, de vrye encyklopedy

Krödde (ondertitel: Grunneger tiedschrift) was n tiedschrift veur verhoalen en gedichten ien de Grunneger toal. t Verscheen van 1982 töt ìnd 2015 op zien minst vaaier moal ien t joar en wordde drokt ien Stad. Oprichters waren Wim de Lange, Fokko Veldman, Henk Scholte en Hanny Diemer[1]. De redakteuren waren op t lest Jan Glas, Willem Hartholt en Geesje Vos. Lözze nummers liggen nog in verschaaiden biebeltaiken en binnen te bestellen.

Krödde is kommen noar veurbeeld van t Drìntse letterkundege tiedschrift Roet (opricht ien 1979) en t eerdere blad De Pennevogel (1974-79). De Oostfraise tegenhonger van Krödde is Diesel. Krödde is der mit stopt toen redakteuren mainden dat t tiedschrift in de pepieren vörm nait of onvoldounde konkeraaiern kon mit nijmoodse media. Veur n frizze en nijmoodse oetgave hebben zie geen nije redaksie-/bestuursleden vinden kind. t Is in dezìmber 2016 opvolgd deur t digitoale tiedschrift veur Grunneger literatuur Oader.

De Grunneger dichters Jan Glas en Aly Freije, dij baaiden dichtwaark stoan haren ien Krödde, hebben ien 2006 resp. 2008 de Freudenthal-Pries veur nije Leegsaksische schrieverij wunnen.

Boetende hìnwiezen[bewark | bronkode bewarken]

  1. Lezen en schrieven in Grunneger toal: 'Dankwoord oetsproken bie 25 joar KRÖDDE', Hanny Diemer, (blz. 59), oetg. Tonnis Musschenga & Tonko Ufkes, 2008. Roadpleegd op 24 september 2018.