Kontaktleans

Uut Wikipedia, de vrye encyklopedy
Kontaktleans

n Kontaktleans is ne kiekhulpe van plastik wat op t oge dreagn wörd. Duur automatiseerde haandelings wörd t stukn plastik op moate maakt. t Drif op n löagke troanvocht, zoonder at t hoornvlees raakt. De ruumte tusken n leans en t hoornvlees heurt noar n raand hen grötter te wordn.

Nen goodn kontaktleans zorget at:

  • t Hoornvlees genog zoerstof krig
  • He nit tevölle of te weainig verskof op t oge
  • t Dreagn dr van nit zorget at t oge nen aandern vorm krig

Nöast kontaktleanzn kan iemand den't kiekhulpe neudig hef ook vuur nen bril kiezn.

Oge met kontaktleans

Soortn leanzn[bewark | bronkode bewarken]

Bie kontaktleanzn is dr oonderskeid tusken harte en zachte leanzn.

Harte leanzn[bewark | bronkode bewarken]

Harte of vörmvaste leanzn goat lange met en loatt völle zoerstof duur. Dit leste is gezoond vuur t oge. Ook zorget harte leanzn at t oge meender rap meender skarp geet zeen. t Noadeel van harte leanzn is det ze mangs nit fein zitt; ze buugnt nit zo makkelik met. Harte leanzn goat duur mekaar n antal joar met en zeent goodkoop te onderhooldn.

Doarnöast bestoat dr nog nachtleanzn. Disse doo'j op t oge vuur a'j goat sloapn en doo'j oet a'j wier wakker wordt. Iej mut ze tenmeenste vief uur achter mekaar inhebn. Nachtleanzn trekt de oppervlaktekromming van t hoornvlees in de gode vorm. Dit is noa ongevear aanderhalven dag wier oet ewarkt. Disse leanzn warkt töt ne starkte van -5,5 dioptrie. t Vuurdeel van dit soort leanzn is de'j oawerdag niks op t oge hoowt te hebn.

Zachte leanzn[bewark | bronkode bewarken]

Zachte leanzn wordt emaakt van n soort polymear wat op perspex lik, en wat boegzaam wörd as t nattig wörd. Disse leanzn zeent grötter en boegzamer as harte leanzn. Dr zeent ok meender soortn moatn as bie harte leanzn, umdet n leans zikzelf better anpast an de vorm van t oge. Duurdet t materiaal vochtduurloatnd is, zog t zik vaste an t oge, woerduur t makkelik zit. Disse leanzn wordt gaauwer troebelig, umdet dr oet t troanvocht völle stöfkes in de leanzn achterbliewt. Dit soort leanzn mut aait vochtig bliewn, umdet ze aanders verdreugnt en köant brekn. Beaide harte en zachte leanzn kö'j better 's nachtes oetdoon, en t is verstaandig um de oogne regelmoatig noa te loatn kiekn bie nen kontaktleansverkoper of nen optometrist.

Dr zeent zachte leanzn dee't mer eenn dag edreagn köant wordn, leanzn dee't nen moand metgoat, en leanzn dee't n half joar metgoat.