Hachikō

Oet Wikipedie, de vraaie enzyklopedie
Gao naor: navigasie, zeuk

Hachiko (ハチ公) (Odate, 10 november 1923 - Tokio, 8 meert 1935), in 'n Japans ok bekend as chūken Hachikō (忠犬ハチ公 "trouwe hond Hachiko"), was 'n Akita die in Japan heel bekend ewörn is deurdat e nao 'n dood van zien baasie 9 jaor lange wachten op diens teruggekeer bi'j 'n treinstasjon Shibuya in Tokio. Nao zien dood wörn veur 'n Station Shibuya 'n staandbeeld veur 'm op-ericht. De vachte van Hachiko is bewaord gebleewm in 'n museum van Ueno.

Leven[bewark | bronkode bewarken]

Hachiko wörn geboorn op 'n boerderi'je naobi'j 'n stad Odate in de prefectuur Akita. In 1924 wörn e eköch deur Hidesaburō Ueno, 'n professor an 'n Universiteit van Tokio, die 'm naor Tokio metnamen.

Hidesaburo Ueno namen elken dag 'n trein naor 'n universiteit vanof 't stasjun Shibuya. Al snel leerden Hachiko um zien baasie ’s ochens naor 'n stasjun te begeleiden, en ’s middags weer bi'j 't stasjun of te halen. Disse routine wörn deur de twee herhaald töt meej 1925. Die maond kwamen Ueno te overliên op 'n universiteit deur 'n hatteverlamming. Hachiko wachtten den dag zo as e wend was bi'j 't stasjun. Toe Ueno echter nie kwamen opdaagg, bleef Hachiko elken dag terugge keren naor 'n stasjun. Hachiko wörn, toe Ueno’s dood bekend wörn, vort-egeewm an 'n ni'jen eagnaar, mar hi'j ontsnapten geregeld waornao hi'j aait weer terugge keerden naor ofwel 'n huus van Ueno of 't treinstasjun.

Deur dit gedrag wörn Hachiko al snel bekend bi'j de völle reizigers die daagliks 't stasjun bezöchtten, en die Hachiko eerder saamen haaden ezien met Ueno. De meansen die 'm kenden gaawm 'm te etten en verzörgden 'm as hi'j verwond was deur te vechten met aandre honden die hi'j op zien weg teeggkwamen. Iene van disse meansen was 'n oale student van Ueno, die now onderzuuk deuden naor 't Akita-ras. Hachiko’s populariteit breijdden zich uut töt verre buten 't stasjun. Hi'j wörn mede deur de andacht die kraanten an 'm schunken 'n sensatie in Japan. Meansen zaagn 'm as 'n toonbeeld van familietrouw waor menig meanse 'n goed veurbeeld an können nemmen. Leraren en olders gebruukten Hachiko dan ok as veurbeeld as ze kinder de weerde van familie proberen bi'j te brengen.

In totaal wachtten Hachiko 9 jaor lange bi'j 't stasjon op de terugkeer van Ueno. Hi'j störf op 8 meert 1935 op zien bekende plekkie op 't stasjon.

Hachiko wörn nao zien dood op-ezet en stiet teegnwoorig in 'n National Museum of Nature and Science.

Nuvola apps ksig.png Dit artikel is eskreven in t Sallaands.