Gerard Ekdom

Gerard Ekdom (Utrecht, 26 meart 1978) is ne Neerlaandse radiomaker en tellevisieprissentator.

September 2001 dut he alle woarkdeage t langst nog bestoande radioprogramma van de wearld, Arbeidsvitaminen, verzörgen. In t begin leup t programma van 9.00 uur töt 12.00 uur, mer seend 1 september 2008 hef he t eerste uur in eleawerd op Giel Beelen. Vanof 6 september 2010 zal hee van moandag töt en met doonderdag n niej programma goan maakn: Effe Ekdom, wat zal loopn tusken 12.00 uur en 14.00 uur.

Nöast zin bekeande Arbeidsvitaminen hef Ekdom ook nog vriedagsoawnds met Michiel Veenstra van 19.00 uur töt 22.00 uur t programma Ekstra Weekend en 's nachtes van vriedag op zoaterdag dut hee van 4.00 uur töt 7.00 uur t programma Ekdom in de nacht.

Hee hef verskeaidene moaln met edoan an de spesjale geeldophaalaksie 3FM Serious Request, woerbie't hee in t Glazen Hoes hef ezetn.

Loopbaan

Ekdom was dr al vroo bie, want doo't he 14 was wör he al regelmoatig eneugnd um op feestjes muziek te dreein. Hee krig n programma op Radio De Bilt en hee hof ook ewoarket bie Stadsomroep Utrecht en NEW Dance Radio. Det programma bie n Utrechtsen Stadsumroop har hee te daankn an Fred Siebelink, den um doar anbeveul. Ekdom tröf ooit Siebelink es in Utrecht (hee kon um kenn an zinne stemme) en spreuk um an.

In 1996 steurdn Ekdom n beandken op noar Jan Steeman van de AVRO. Den leut um too met n nachtprogramma, en zogedöanig köm Ekdom in 1998 in opleadige bie 3FM. Oonderwiel dee he nog radiomaakn bie Magic FM en Hot Radio. In 2000 mocht he n moal invaln vuur Wim Rigter in t programma Arbeidsvitaminen. Det bevöl zo good, det hee t in 2001 oawer moch nemn.

Oonderwiel is Arbeidsvitaminen is best-belusterde programma van 3FM. Ekdom steet bekeand um zinne onmeundige muziekkennis, en um ne angeneam anbod van kenmoarkende "arbeidsvitaminen-plaatn", woer't he mangs ne zogeneumde freakplaat tuskenduur dreeit. Ook hef hee as vast oonderdeel de barbequeplaat, wat n bliej versken mut wean wat good op ne bröadseloawnd zol könn pasn. Ook n vast oonderdeel is zin "Bedrijven Top 10", woerbie't bedriewe ne muzieklieste köant opsteurn, en de baas wörd oet erop töt "Baas van de dag".

Oktober 2008 köm zin eegne leawnsbeskriewige oet, met as titel 'Ik Zal Kijken Wat Ik Voor Je Kan Doen', wat ene van zinne bekeande oetsproakn is.

Oetsproakn

Ekdom hef in zin programma n antal standaard oetsproakn, dee't duur zinne anhangers en tooheurders regelmoatig an ehaald wordt:

Die Lucht!
Rock 'n' Roll!
Keiharde Porno! Gatverrrdamme!
Eine Deutsche Schallplatte!

Oetgoande verbeendige

Commons: Gerard Ekdom - plaatjes, filmkes en/of gelüüdsbestanden.