Frieja

Uut Wikipedia, de vrye encyklopedy
Heimdallr brecht Freya de halskeatene Brísingamen weader. Skilderd döär den sweyd Nils Blommér

Freya (ouk wal eskreaven as Freja, Freia of freyja) is in et germaanske volksgelöyv de godinne van leevde, skounheid, vrüchtbårheid, seks, oorlog, gold en seiðr-magy. See hevt ne halskeatene Brísingamen, ridt up ne kåre med twey katten der vöär, hevt geselskap van et swyn Hildisvíni en hevt nen mantel van valkenveaderen. See is gek up leevdesleedkes en löt sik makkelik anbidden. Med öären man Óð hevt see twey dochters, Hnoss en Gersemi. Med öären tweylingbröder Frey, öären vader Njörd en öären moder (den as ne süster is van Njörd, mär wår as vanuut de brunnen ginnen name van bekend is) is see eyne van de Wanen.

Freya heyrst oaver en heamelsk veld, Volkvanger (Fólkvangr). See krigt de hälvde van dee wat up slagvelden ümmekummet, de andere hälvde is vöär Wodens halle Valhalla. Binnen Volkvanger steyt öäre halle Seskamer (Sessrúmnir). Freya helpet vake andere goden döär se öären veadermantel te leynen, wördt anbeaden by allerhande leevdes- en vrüchtbårheidssaken en krigt regelmåtig trouwversöken van starke jötnar. Freya's kearl, den god Ood (Óðr) is der vake neet. See göälet trånen van roud gold vöär em en söcht em regelmåtig under skuulnamen, sou as Gefn, Hörn, Mardöll, Sýr, en Vanadís.

Et is neet düdelik up wat vöär ne wyse of Freya anbeaden wör. Ouk meynet wat geleyrde lüde at Freya feitelik deselvde godinne is as Frigg, de vrouwe van Woden.

Steade in et gelöyv[bewark | bronkode bewarken]

Frigg en Freya sint de twey vöärnaamste godinnen van de Asynjur, de belangriekste goden in et germaanske gelöyv. Van beide wördt anenöämen dat Freya de meyste andacht krigt. In de Droplaugarsona Saga steyt dat by Ölvusvatn in Ysland twey standbealden stünden van disse twey godinnen, teagenoaver dee van Donar en Frey. Se warren ryk versyrd med gold en silver.

In de Heimskringla (vry ümmesat: den Eardskring) steyt Freya beskreaven as ne mythologise prinsesse van Sweyden. Öaren vader Njord was den tweyden köäning van Sweyden en öären bröder Frey den darden.

Freya en Frey öären moder was ne süster van öären vader Njord. Dit was neet ungewoan by de Wanen (Vanir).

Vermeldingen[bewark | bronkode bewarken]

Dicht-edda[bewark | bronkode bewarken]

In de dicht-edda steyt Freya in de gedichten Völuspá, Grímnismál, Lokasenna, Þrymskviða, Oddrúnargrátr en Hyndluljóð.

Völuspá hevt en vers wårin as see "Ood syn mäken" enöömd wördt. Freya is ja de vrouwe van Óðr. Volgens et vers was Freya versegd an nen neet-enöömden bouwer, den as later nen jötunn blikt te weasen. Donar düt em doud, wat uutvorig beskreaven steyt in höyvdstükke 42 van de Gylfaginning. In et gedicht Grímnismál vertelt Woden (vermumd as Grímnir) an nen jungen Agnar dat Freya alle dage stöle vryhöldt in öäre halle up Volkvanger, vöär de hälvde van de lüde wat ümmekummet up et slagveld. Woden krigt dan de andere hälvde.

Lokasenna

In et gedicht Lokasenna beskuldigt stoakegod Loki sowat alle vrouwlüde an tåfel van lösbandigheid en untrouw. Freya kümt em achteruut den hals temöte. In et begin van et gedicht steyt dat Freya by en feast is van Ægir. Nådat Loki nen set eflyted hevt med de godinne Frigg, kümt Freya der tüsken. See nöömt Loki nen halven gek, dat hee syne nåre streyken der by haalt en dat Frigg et lot van alleman weat, al sal see niks seggen. Loki segt dat see de lippe müt holden en dat hee genog van öär weat - dat Freya der ouk neet underuut kümt, ümdat see med alle goden en elven in de halle hevt liggen knoien. Freya löt sik upporken. See kümt up de achterste beyne en nöömt Loki nen löägenbüdel, dat hee gewoan gaerne dikke babbels hevt en dat hee med den start tüsken de beyne up huus an kan, want hee hevt alle goden hellig emaked. Loki segt öär weader de lippe te holden, nöömt öär ne kwåde hapskaere en sogt en verhaal uut den duum wårby as Freya boavenup öären bröder trappeerd wördt döär de lachende goden. Njörd kümt der tüsken. Hee meynt dat der gin kwåd an is as ne vrouwe mangs under den dråd hen vreat, en hee wist der up dat Loki selv kinder eboard hevt en nöömt em ne smearpype. Sou geyt et noch nen set wyder.

Þrymskviða

In et gedicht Þrymskviða leynt Loki Freya syn veadermantel en verkleydet Donar sik as Freya üm de hitsige jötunn Þrymr by den buk te doon. In et gedicht wördt Donar wakker en untdekket dat synen hamer Mjöllnir vord is. Donar vertelt et Loki, en med mekander gåt se når den prachtigen hov van Freya. Donar vrögt of hee öären mantel leynen mag üm synen hamer weader te vinden. Freya vindt et good. Loki vlögt der up uut med de susende veadermantel. In et land Jötunheim süt hee Þrymr up nen barg sitten. Den vertelt em dat hee Donar synen hamer depe in de aerde verbörgen hevt en dat nüms der ooit achterkumt wår, behalve as se em Freya te trouwen brengt. Loki vlögt weaderümme med den susenden mantel. In de godenhalle vertelt Loki allens an Donar. Te houpe gåt se når Freya. Donar segt Freya en mooi kleyd an te trekken en nen bruudssloier up et höyvd te doon, want se gåt når Jötunheim. Freya wördt hellig, want wat meynt Donar wal neet. De godenhallen sküddet der van, sou hellig. Öäre halskeatene Brísingamen valt öär van den hals.

De goden en godinnen belegget en ding üm te bespreaken wo as se et probleem müt anvlegen. Heimdall stelt vöär üm Donar as bruud, med bruudskleyd, höyvdsloier, klinkende slöätels, upsmük en et krounjuweel Brísingamen en al der hen te stüren. Nu wördt Donar hellig, hee geyt sik toch neet as bruud verkleyden? Loki weat em te süssen en höygt em der an dat anders de nye eygenaars van de hamer hyr binnenkort by an de tåfel sittet as se den hamer neet rap weaderkryget. Donar löt sik as bruud antrekken en Loki as bruudsmäken. Sou vertrekket see når Jötunheim. Undertüsken hevt Þrymr syne bedeenden al updracht egeaven üm den dochter van Njörd te untvangen. As "Freya" den anderen morgen up de stope steet, raket Þrymr en beaten van de wyse van öär gedrag. See eat en suupt toch wal machtig nen houp; nen heylen ossen, groute telders vul viske en dree vaten beer. En as Þrymr 'Freya' under synen sloier probeert te küssen, skrikket hee sik dum van öäre verskrikkelike ougen en springt de halle döär. Den vermumden Loki veruntskuldigt de bruud öär vrömde gedrag. Se hebbet ja acht dagen neet egeaten en eslåpen üm hyr sou rap möägelik te kummen. En den bruud syne ougen brandet van leevde. Dat stelt den jötnar wat geröste, den as trouwens ouk nen mooien skuur drank uphevt. Et is tyd vöär de bruudsgeschenken. Þrymr legt Freya den hamer Mjöllnir up den skout. Donar gript synen kans, hauwt alle jötunn af en geyt der med synen hamer van tüsken.

Kristelike tyd[bewark | bronkode bewarken]

Ümdat de roumsk-katolike karke weinig uphad med vrouwlüde dee te vry warren en meyr med de maagdelike Maria, wör Freya rap ne hore nöömd en verbannen uut et dagelikse leaven. Toch bleav Freya up wat steades in Skandinavie noch töt et midden van den 19. eywe anbeaden en is see nu underdeyl van skandinaviske folklore. In de Heimskringla steyt dat Olaf Tryggvason en St. Olaf vöäle germaanske heiligdommen verwoosteden as underdeyl van de kerstening van Skandinavie.

Naamherkumst[bewark | bronkode bewarken]

De namen Freyer en Freya kummet beide van germaanske wöörde vöär heyrskap en heyrinne. Germaanske anverwante wöörde sint et gotiske fráuja (heyrskap, meister), fráujo (heyrinne, meisteresse), et oldnoorske frú 'meisteresse, heyrinne, vrouwe', däänsk frue, sweydsk fru, düütsk Frau, oldhougdüütsk Frouwa en neadersassisk 'vrouwe'. Net as by et franske woord 'dame', wat van latynsk 'domina' kümt en wårvan as den manneliken förm (latynsk dominus) neet meyr gebruked wordt, wördt den manneliken förm van Freya (freyr) håste neet meyr gebruked, terwyl as verskeidene förme van 'vrouwe' noch altyd in heyl wat germaanske språken vöärkummet.

Freya synen name kan wat te maken hebben med Frigg. Dat woord anverwant med et sweydske warkwoord att fria (ene te trouwen vrågen). De wöörde van vrouwe en hüwelik/leevde ståt altyd med mekander in verband, en Freya en Frigg ligget kort by mekander: Frigg, Frige, Fri-je, Fri-ja, Freja, Freia).

Neadersassisk[bewark | bronkode bewarken]

In et neadersassisk en et hollandsk kümt de name van Freya weaderümme in den 5. dag van de weake: vrydag. Mär ouk in de leevde kümt de name noch weaderümme: van en stel wat verkeyring hevt wördt wal esegd dat dee med mekander vryen doot of dat se hen vryen gåt. Dat hoovt in et neadersassisk niks med seks te maken te hebben.